پاکستان کو سیلاب کی تباہ کاریوں سے نمٹنے کے لئے عالمی برادری کے ٹھوس تعاون کی ضرورت ہے،سیکرٹری جنرل اقوام متحدہ
اقوام متحدہ کے سیکرٹری جنرل انتونیو گوتیرس نے کہا ہے کہ پاکستان کو اگست میں آنے والے شدید سیلاب کے سبب بڑے پیمانے پر تباہ کاریوں سے نمٹنے کے لیے عالمی برادری کے ٹھوس تعاون کی ضرورت ہے،ملک کی تعمیر نو کے لئے امداد اکٹھی کرنے کے سلسلہ میں جنیوا میں 9 جنوری سےشروع ہونے والی عالمی کانفرنس میں ان کی توقعات سے متعلق اے پی پی کے سوال پر اقوام متحدہ کے سربراہ نے کہا کہ پاکستان کی مدد کرنا عالمی برادری کی بڑی ذمہ داری ہے ، اقوام متحدہ کے سیکرٹری جنرل پاکستان کے وزیر اعظم شہباز شریف کے ہمراہ کانفرنس کی مشترکہ میزبانی کریں گے۔
پاکستان میں سیلاب سے 33 ملین افراد متاثر ہوئے ہیں اور 1700 سے زیادہ ہلاک ہوئے ۔سیکرٹری جنرل انتونیو گوتیرس نے نیویارک میں اقوام متحدہ کے ہیڈ کوارٹرز میں سال کے آخر میں اپنی پریس کانفرنس سے خطاب کرتے ہوئے کہا کہ میں پاکستان کی حمایت کے لیے عالمی برادری کو متحرک کرنے کے لیے ہر ممکن کوشش کرنے کے لیے پرعزم ہوں۔
انہوں نے کہا کہ میں سیلاب آنے کے فوراً بعد پاکستان گیا اور وہاں جو کچھ دیکھا اس سے شدید متاثر ہوا۔انہوں نے کہا کہ میرے اپنے ملک پرتگال میں بھی تین بار سیلاب آیا، پاکستان میں بالخصوص سندھ اور بلوچستان میں سیلاب سے شہریوں کے جانی نقصان کے علاوہ فصلوں،جانوروں اور مکانات کو بہت نقصان پہنچا ،یہ ایک تباہ کن صورتحال ہے اور میں سمجھتا ہوں کہ ان حالات میں عالمی برادری کی بڑی ذمہ داری ہے کہ پاکستان کی بھرپور مدد کی جائے ۔
آئندہ جنیوا کانفرنس کا ذکر کرتے ہوئے سیکرٹری جنرل نے کہا کہ اس کا مقصد ان وسائل کو مکمل طور پر متحرک کرنا ہے جن کی ضرورت ہے۔اقوام متحدہ کے سربراہ نے مزید کہا میں آئی ایم ایف اور ورلڈ بینک کے ساتھ بھی حالیہ رابطے میں رہا اور امید ہے کہ ان دونوں اداروں سے بامقصد اقدامات کئے جائیں گے جس کے پاکستانی عوام مستحق ہیں اور انہیں مضبوط بین الاقوامی اظہار یکجہتی کی ضرورت ہے ۔
