پاکستان خطے میں مزید کسی جنگ کا حصہ نہیں بنے گا، عالمی حالات پرنظرہے، وزیراعظم

اسلام آباد :پاکستان خطے میں مزید کسی جنگ کا حصہ نہیں بنے گا، عالمی حالات پرنظرہے،وزیراعظم عمران خان نے عمانی وزیر مذہبی امور سے ملاقات میں مشرق وسطیٰ کی کشیدہ صورتحال پر اظہار تشویش کرتے ہوئے کہا جنگ کسی کے بھی مفاد میں نہیں ، پاکستان خطے میں مزید کسی جنگ کا حصہ نہیں بنے گا۔

تفصیلات کے مطابق وزیراعظم عمران خان سے عمانی وزیر مذہبی امور سلطان قبوس بن سید کی ملاقات کا اعلامیہ جاری کردیا گیا، وزیراعظم نے سلطان قبوس بن سید کیلئے نیک خواہشات کا اظہار کرتے ہوئے کہا پاکستان اورعمان مختلف شعبوں میں تعاون بڑھاسکتےہیں۔

وزیراعظم نے مسلمانوں سمیت اقلیتوں سےامتیازی سلوک کی بی جےپی پالیسیوں سےآگاہ کرتے ہوئے کہا عالمی برادری کو صورتحال سے نمٹنے کے لیے اقدامات کرنا ہوں گے۔ملاقات میں وزیراعظم عمران خان نے مقبوضہ کشمیرمیں بدترین انسانی صورتحال سےعمانی وزیرکوآگاہ کیا اور کہا مقبوضہ کشمیر میں5 ماہ سے بدترین لاک ڈاؤن جاری ہے۔

اعلامیہ میں کہا گیا کہ ملاقات میں مشرق وسطیٰ کی تازہ صورتحال پر بھی بات چیت ہوئی اور وزیراعظم نے مشرق وسطیٰ کی کشیدہ صورتحال پر اظہار تشویش کرتے ہوئے کہا مزید کشیدگی سے بچنے کے لیے اقدامات کرنا ہوں گے۔
وزیراعظم کا کہنا تھا کہ جنگ کسی کے بھی مفاد میں نہیں، خطے میں تنازع سےپاکستان کو بہت نقصان ہوا ہے، پاکستان خطے میں مزید کسی جنگ کا حصہ نہیں بنے گا۔

عمانی وزیر سے بات کرتے ہوئے وزیراعظم عمران خان کا کہنا تھا کہ ایران امریکاکشیدگی کم کرنے کی کوشش کی، ایران اورسعودی عرب تنازعات ختم کرنےکیلئےبھی کوششیں کی، پاکستان ہمیشہ امن کا پارٹنر بنے گا اورامن کےفروغ،تنازعات کے خاتمے کیلئےکردار ادا کرے گا۔