نیپال سے ٹھنڈی ہوائیں :ساؤتھ ایشین گیمز میں پاکستان نے مزید 4گولڈ میڈل حاصل کرلیے
کھٹمنڈو:13ویں ساؤتھ ایشین گیمز میں پاکستان نے مزید 4گولڈ میڈل حاصل کرلیے ، ایونٹ میں پاکستان کے مجموعی طلائی تمغوں کی تعداد 6 ہوگئی ہے۔نیپال کے شہروں کھٹمنڈو اور پوکھارا میں جاری ساؤتھ ایشین گیمز میں پاکستانی ایتھلیٹس 6 گولڈ ، 11 سلور اور 15 برانز میڈلز اپنے نام کرچکے ہیں۔
نیپال سے ذرائع کے مطابق منگل کو پاکستان نے 4 گولڈ میڈلز اپنے نام کیے، پاکستان کے چیمپئن کراٹیکاز ، سعدی عباس نے پاکستان کے لیے مائنس 75 کے جی ویٹ کیٹیگری میں گولڈ میڈل حاصل کیا۔
پاکستان کے شاہ زیب نے تائیکوانڈو میں 54 کلوگرام کے مقابلوں میں طلائی تمغہ جیتا۔جب کہ تائیکوانڈو میں سدرہ بتول اور محمد فہیم نے چاندی کے تمغے حاصل کیے ۔پاکستانی کراٹیکاز نصیر احمد، ثناء کوثر اور کلثوم ہزارہ نے اپنی ویٹ کیٹیگریز میں سلور میڈلز حاصل کیے جب کہ ناز گل نے برانز میڈل جیتا۔
شوٹنگ کے مقابلوں میں بھی پاکستان نے 2گولڈ میڈلز جیتے، خلیل اختر، غلام مصطفٰی بشیر اور مقبول حسین پر مشتمل پاکستان ٹیم نے سینٹر فائر پسٹل جب کہ غفران عادل، عاقب لطیف اور ذیشان شاکر نے تھری پوزیشن رائفل ٹیم ایونٹ میں گولڈ میڈل جیتا۔شوٹنگ میں ہی خلیل اختر نے سینٹر فائر پسٹل کے انفرادی مقابلوں میں کانسی کا تمغہ جیتا۔
پاکستان والی بال ٹیم کو فائنل میں بھارت کے ہاتھوں 1-3 کی شکست ہوئی جس کے بعد وہ سلور میڈل کی حقدار قرار پائی ۔جبکہ 100 میٹر دوڑ میں پاکستان کے سمیع اللہ نے برانز میڈل حاصل کیا۔نیپال کے دارالحکومت کھٹمنڈو سے اطلاعات کے مطابق بیڈمنٹن میں مینز اور ویمنز ٹیمیں بھی سیمی فائنل میں شکست کے بعد برانز میڈل کی حقدار قرار پائیں۔
ٹینس میں پاکستان ٹیم سری لنکا کو سیمی فائنل میں شکست دینے کے بعد مینز ٹینس ٹیم ایونٹ کے فائنل میں پہنچ گئی، پاکستان کی جانب سے عابد اور مزمل نے کامیابیاں حاصل کیں۔ دوسری جانب خواتین کے انفرادی بیڈمنٹن مقابلوں میں پاکستان کی پلوشہ بشیر اور ماحور شہزاد نے ابتدائی راؤنڈز میں کامیابی حاصل کرلی۔
