پارٹی کارکن حکمرانوں کے خلاف احتجاج کیلئے خود کو تیار کریں،قمر زمان کائرہ کا اجلاس میں اعلان

پارٹی کارکن حکمرانوں کے خلاف احتجاج کیلئے خود کو تیار کریں،قمر زمان کائرہ کا اجلاس میں اعلان

باغی ٹی وی کی رپورٹ کے مطابق پیپلز پارٹی پنجاب کی ایگزیکٹیو کمیٹی کا اجلاس ہوا،پیپلز پارٹی پنجاب کے صدر قمر زمان کائرہ نے اجلاس کی صدارت کی

دیگر شرکاء میں چودھری منظور احمد،اسلم گل، حسن مرتضی ملک عثمان شامل ہیں۔ ثمینہ خالد گھرکی ،عزیز الرحمن چن،تسنیم قریشی، علامہ یوسف اعوان،رائے شاہجہان بھی اجلاس میں شریک ہیں۔ غلام فرید کاٹھیا،اظہر حسن ڈار،جاوید بھٹی،ذوہیب بث، موسیٰ کھوکھر،شہزاد چیمہ،سسرار بٹ،ڈاکٹر ضرار بھی اجلاس میں شریک ہیں۔

اجلاس سے خطاب کرتے ہوئے قمر زمان کائرہ کا کہنا تھا کہ پنجاب پارٹی کا ریویو جاری ہے ۔ناقص کارکردگی والے عہدیدار وں سے معذرت کر لی جائے گی۔ پارٹی کارکن حکمرانوں کے خلاف احتجاج کیلئے خود کو تیار کریں۔ پیپلز پارٹی کے کارکنوں نے ہی ہمیشہ سیاسی جمود کو توڑا ہے

قمر زمان کائرہ کا مزید کہنا تھا کہ کٹھ پتلی حکومت مزدوروں،کسانوں تاجروں اور عوام کا اعتماد کھو چکی ہے۔ حکمرانوں کی چرب زبانی اور جھوٹ عوام کے سامنے بے نقاب ہو چکے ہیں۔ عوام کی مشکلات اور مصیبتوں میں بے پناہ اضافہ ہو چکا ہے۔ ملک میں کرپشن کا بازار گرم ہے لیکن کہا جارہا ہے وزیراعظم تو کرپٹ نہیں۔

قمرزمان کائرہ کا مزید کہنا تھا کہ پنجاب میں سرکاری لو ٹ مار اور افراتفری جاری ہے، کوئی پوچھنے والا نہیں۔ پیپلزپارٹی کے عہدیدار اور کارکن عوام کے ساتھ کھڑے ہیں۔