وزیر اعظم شہباز شریف کا نائب وزیر اعظم اسحاق ڈار کی رہائشگاہ پر تعزیتی دورہ

اسلام آباد: وزیر اعظم پاکستان محمد شہباز شریف نے نائب وزیرِ اعظم و وزیرِ خارجہ اسحاق ڈار کی رہائشگاہ پر پہنچ کر ان کے بڑے بھائی کے انتقال پر گہرے دکھ اور افسوس کا اظہار کیا۔ وزیر اعظم نے مرحوم کی مغفرت اور ان کے درجات کی بلندی کے لیے فاتحہ خوانی کی جبکہ اہلِ خانہ کے لیے صبر جمیل کی دعا بھی کی۔تعزیت کے اس موقع پر وزیر اعظم شہباز شریف کے ہمراہ وزیرِ داخلہ محسن نقوی بھی موجود تھے۔ وزیرِ اعظم نے دکھ اور غم کی اس گھڑی میں اسحاق ڈار اور ان کے خاندان کے ساتھ مکمل ہمدردی کا اظہار کرتے ہوئے کہا کہ وہ اس سانحے میں ان کے ساتھ برابر کے شریک ہیں اور اللہ تعالیٰ سے دعا گو ہیں کہ مرحوم کو جنت الفردوس میں اعلیٰ مقام عطا فرمائے۔واضح رہے کہ اسحاق ڈار کے بڑے بھائی کا انتقال گزشتہ روز ہوا تھا، جس پر ملک کی سیاسی اور سماجی شخصیات کی جانب سے اظہارِ تعزیت کا سلسلہ جاری ہے۔ مختلف حکومتی عہدیداروں اور اہم سیاسی رہنماؤں نے بھی تعزیتی پیغامات بھیجے ہیں، جس میں انہوں نے مرحوم کی خدمات کو سراہا اور ان کے خاندان کے لیے دعا گو ہوئے۔اس موقع پر وزیر اعظم نے اسحاق ڈار کے اہلِ خانہ کو صبر کی تلقین کرتے ہوئے کہا کہ دکھ اور تکلیف کے اس لمحے میں پوری قوم ان کے ساتھ کھڑی ہے۔