غزل: یقیں میں یا گُماں میں ہے،شاعر: جاویدؔ ڈینی ایل

یقیں میں یا گُماں میں ہے

مگر تُو اِس جَہاں میں ہے

قصیدہ یا غزل میری

تُو ہی حرف و بیاں میں ہے

یہاں کوئی نہیں اپنا

ہر اک سود و زیاں میں ہے

فراق و وصل مت پوچھو

سبھی آہ و فغاں میں ہے

جھلک جس کی ہے آنسو میں

وہی دردِ نہاں میں ہے

دھڑکتا ہے یہاں لیکن !!

یہ دِل کُوئے بُتاں میں ہے

شگفتہ گفتگو تیری

مرے شیریں دہاں میں ہے

ترا حسنِ تغزل بھی

بیاں اہلِ زباں میں ہے

یہاں جاویدؔ ! غم ہی غم

خوشی تو اُس جہاں میں ہے