ننکانہ، ڈکیتی، چوری کی وارداتوں کی لہر، شہری لاکھوں کے مال سے محروم

ننکانہ صاحب
(احسان اللہ ایاز باغی ٹی وی نامہ نگار )

ننکانہ صاحب کے مختلف علاقوں میں ڈکیتی اور چوری کی متعدد وارداتوں نے شہریوں کو پریشان کر دیا۔ شہری لاکھوں روپے مالیت کے مال و زر سے محروم ہو گئے۔ت

فصیلات کے مطابق شاہکوٹ کے رہائشی مزمل حسین جڑانوالہ سے واپس گھر آ رہے تھے کہ تھانہ صدر شاہکوٹ کے علاقے کوٹ نظام دین سٹاپ کے قریب دو نامعلوم موٹر سائیکل سوار مسلح ڈاکوؤں نے انہیں گن پوائنٹ پر روک لیا اور 18 ہزار روپے نقدی چھین کر فرار ہوگئے۔تھانہ منڈی فیض آباد کے علاقے کریشیاں والا روڈ پر مرزاپور کے قریب چار مسلح ڈاکوؤں نے جڑانوالہ کے رہائشی افتخار کو گن پوائنٹ پر روک کر 20 ہزار روپے نقدی اور موبائل فون چھین لیا، جبکہ فرار ہوتے ہوئے اسے تشدد کا نشانہ بھی بنایا۔ اسی علاقے میں بھٹہ چوک منڈی فیض آباد میں نامعلوم چور المدینہ فرٹیلائزر کے مالک زاہد جاوید کی دکان کے تالے توڑ کر کیش بکس سے 2 لاکھ 32 ہزار روپے نقدی اور 15 لاکھ روپے مالیت کا چیک لے گئے۔ مزید برآں، کھولے کوٹ امین روڈ پر باغ میں چھپے تین مسلح افراد نے عباس بھٹی کو روک کر 7 سے 8 ہزار روپے نقدی اور موٹر سائیکل چھین لی۔تھانہ مانگٹانوالہ کے علاقے ببر والا میں دربار رائے احمد علی پر سوئے ہوئے سلیم علی کے پرس سے نامعلوم چور 20 ہزار روپے نقدی، موبائل فون اور موٹر سائیکل کے کاغذات چوری کرکے لے گئے، جبکہ رتی ٹبی کے گورنمنٹ پرائمری سکول سے چار پنکھے اتار کر لے گئے۔تھانہ صدر سانگلہ ہل کے علاقے روڑی والا میں نامعلوم چور عرفان علی کے زرعی رقبے سے تقریباً ایک لاکھ روپے مالیت کی ٹرانسفارمر کوائل اور بجلی کی تار چوری کرگئے۔تھانہ بڑا گھر کے علاقے کوٹ نامدار میں رائے فضل عباس کے زرعی رقبے میں نصب ٹیوب ویل سے نامعلوم چور سٹارٹر اور 90 گز تانبے کی تار لے اڑے۔تھانہ واربرٹن کے علاقے سبحان پورہ میں شادی کی تقریب میں شرکت کے لیے آنے والے مانانوالہ کے رہائشی اسد مسیح کی گھر کے باہر کھڑی موٹر سائیکل نمبر SAK-2395 بھی نامعلوم چور لے گئے۔پے در پے ڈکیتی اور چوری کی وارداتوں کے باعث شہریوں میں تشویش پائی جا رہی ہے، جبکہ پولیس نے واقعات کی تحقیقات اور ملزمان کی تلاش شروع کر دی ہے۔