پاکستان پیپلز پارٹی ساہیوال کے رہنما حسن اقبال جوئیہ نے 1973 کے آئین کی منظوری کو ایک تاریخی دن قرار دیتے ہوئے کہا کہ یہ دن پاکستان کی تاریخ میں ایک سنگ میل کی حیثیت رکھتا ہے۔
حسن اقبال جوئیہ نے اسلامی جمہوری آئین کی منظوری کے 52 سال مکمل ہونے پر کہا کہ شہید ذوالفقار علی بھٹو کا یہ کارنامہ تھا کہ انہوں نے متفقہ اسلامی جمہوری آئین کو منظور کرایا، جس سے ملک میں سیاسی استحکام اور جمہوری اقدار کا قیام ممکن ہوا۔ 1973 کا آئین پاکستان کے عوام کے حقوق کی ضمانت فراہم کرتا ہے اور اس نے ملک کے تمام شہریوں کو مساوات، آزادی اور انصاف کی فراہمی کے اصولوں پر عمل پیرا ہونے کی بنیاد رکھی۔ انہوں نے اس موقع پر پاکستان پیپلز پارٹی کی قیادت اور کارکنوں کی جانب سے ملک کے عوام کو آئین کی منظوری کی 52ویں سالگرہ پر مبارکباد پیش کی۔
حسن اقبال جوئیہ کا مزید کہنا تھا کہ پاکستان پیپلز پارٹی ہمیشہ اس آئین کی حفاظت کے لیے جدوجہد کرتی رہے گی اور شہید ذوالفقار علی بھٹو کے ویژن کو آگے بڑھاتے ہوئے،صدر مملکت آصف علی زرداری، چیئر مین پیپلز پارٹی بلاول بھٹو زرداری کی قیادت میں ملک میں جمہوریت کی مضبوطی اور عوامی حقوق کے تحفظ کے لیے اپنا کردار ادا کرتی رہے گی۔
