بالی ووڈ اداکارہ پرینیتی چوپڑا کی فلم ‘سائنا’ سینما گھروں میں ریلیز کے کچھ ہی گھنٹوں بعد آن لائن لیک ہوگئی۔

باغی ٹی وی : بھارتی میڈیا رپورٹس کے مطابق میڈیا رپورٹس کے مطابق ریلیز کے کچھ ہی گھنٹوں بعد یہ فلم ٹیلی گرام اور مووی رولز جیسے پلیٹ فارم پر ایچ ڈی کوالٹی میں آن لائن لیک کردی گئی جہاں سے یہ ٹورنٹ سائٹس کا ہدف بن چکی ہے۔

رپورٹس کے مطابق فلم کے لیک ہونے کی وجہ سے پروڈیوسرزکو بڑے مالی نقصان کا خدشہ ہے کیونکہ اس سے فلم کی باکس آفس پر کمائی پر اثر پڑ سکتا ہے۔

یاد رہے کہ یہ پہلا موقع نہیں جب کوئی بھارتی فلم اس طرح سے آن لائن لیک ہوئی ہو اس سے قبل گاڈزیلہ بمقابلہ کانگ ، ممبئی ساگا ، روحی ، بمبئی بیگم جیسی متعدد فلمیں اسی طرح لیک ہو چکی ہیں۔

واضح رہے کہ فلم ‘سائنا ‘ہندوستانی بیڈمنٹن کھلاڑی سائنا نہوال کی زندگی پر بنائی گئی ہے اور اس میں ان کے کردار کو پرینیتی چوپڑا نے نبھایا ہے۔

خیال رہے کہ اس سے قبل سماجی رابطے کی ویب سائٹ ٹوئٹر پر پرینیتی چوپڑا کی فلم سائنا کا پہلا پوسٹر شیئر کیا گیا تو اسے سوشل میڈیا صارفین اور بیڈ منٹن کے شائقین کی جانب سے بھر پور شدید تنقید کا نشانہ بنایا گیا تھا دراصل فلم کے پوسٹر میں ایک بنیادی غلطی ہے کہ شٹل کاک کو ہاتھ اوپر کر کے اچھالتے ہوئے دکھایا گیا ہے تاہم بیڈمنٹن میں ایسا نہیں ہوتا۔بیڈمنٹن کھلاڑی ہاتھ نیچے کر کے قدرے الگ طریقے سے شٹل کاک کو ہٹ کرتے ہیں جبکہ اس طرح ٹینس کے کھلاڑی گیند کو ہٹ کرنے کے لیے یہ انداز اپناتے ہیں۔

تاہم اس پوسٹر پر ٹوئٹر صارفین نے شدید تنقید کرتے ہوئے سوال کیا تھا کہ یہ سائنا نہیوال کی بائیوپک ہے یا ثانیہ مرزا کی؟ جبکہ ایک صارف کا کہنا تھا کہ لگتا ہے کہ پوسٹر بنانے والا شخص ٹینس کا شوقین ہے۔

پرینیتی چوپڑا کی نئی فلم ’سائنا‘ کا پوسٹر تنقید کی زد میں