کراچی:پاکستان سپرلیگ کی ٹیم کوئٹہ گلیڈی ایٹرز میں شامل نیوزی لینڈ کے اوپننگ بیٹر مارٹن گپٹل کا کہنا ہے کہ وہ پہلی مرتبہ پاکستان میں کھیلنے کے چیلنج کیلئے تیار ہیں۔ اس حوالے سے کراچی میں میڈیا سے گفتگو میں ان کا کہنا تھا کہ وہ پاکستان سپر لیگ کے آٹھویں ایڈیشن کیلئے پرجوش ہیں۔
36 سالہ مارٹن گپٹل ٹی ٹوئنٹی فارمیٹ میں تجربہ کار ترین اور کامیاب ترین کرکٹرز میں شمار ہوتے ہیں، وہ 2021 میں کراچی کنگز کی جانب سے کووڈ سے متاثرہ پی ایس ایل کا ابو ظہبی مرحلہ کھیل چکے ہیں اس بار وہ کوئٹہ کی جانب سے پاکستان میں میچز کھیلیں گے۔
انہوں نے کہا کہ پاکستان کرکٹ کیلئے ایک بہترین جگہ ہے، وہ نئی ٹیم کی جانب سے کھیلنے کو تیار ہیں، یہاں نئے دوست بھی بنائیں گے اور اچھا کھیلنے کی کوشش کریں گے تاکہ ٹیم کیلئے اپنا کردار ادا کرسکیں۔
دنیا کی مختلف لیگز میں 305 ٹی ٹوئنٹی اننگز کھیل کر 8 ہزار 734 رنز بنانے والے گپٹل کا کہنا ہے کہ پی ایس ایل کا معیار کافی اچھا ہے تاہم وہ اس لیگ کا کسی دوسری لیگ سے موازنہ نہیں کریں گے کیوں کہ ایسا کرنا ان کیلئے ممکن نہیں۔ انہوں نے کہا کہ یہاں اچھی فاسٹ بولنگ، اچھا اسپن اٹیک اور بہترین بیٹنگ سب ہی کچھ ہے۔
بین کٹنگ کو پاکستان کی کونسی چیز سب سے زیادہ اچھی لگتی ہے؟اس حوالے سے ایک سوال پر انہوں نے کہا کہ ٹی ٹوئنٹی چیمپئنز لیگ ایک اچھا ٹورنامنٹ تھا لیکن اب اتنی کرکٹ ہوگئی ہے کہ چیمپئنز لیگ کو دوبارہ بحال کیا جائے تو یہ کیلینڈر کو مزید مصروف کر دے گا لیکن اگر ایسا ہوا تو وہ ضرور اس ٹورنامنٹ کو ایک بار پھر کھیلنا چاہیں گے۔
مارٹن گپٹل نے پاکستانی پیسرز کی تعریف کرتے ہوئے کہا کہ شاہین آفریدی، حارث رؤف، نسیم شاہ اور محمد حسنین کے ہوتے ہوئے پاکستان کا بولنگ اٹیک کافی زبردست ہے، ایسے بولرز کی موجودگی میں پاکستانی فاسٹ بولنگ کا مستقبل کافی روشن اور مضبوط دکھائی دے رہا ہے۔
Leave a reply
