وزیر دفاع خواجہ آصف نے کہا ہے کہ بلوچستان میں حالیہ آپریشن کے دوران پاکستان تحریک انصاف (پی ٹی آئی) اور بھارتی میڈیا کی جانب سے ایک جیسی زبان استعمال کی گئی۔ پاکستان کے بہادر فوجی اور سیکیورٹی فورسز نے ملک کو ایک بڑے سانحے سے بچایا اور جعفر ایکسپریس میں یرغمال بنائے گئے تمام 33 مسافروں کو محفوظ طریقے سے رہا کروا لیا۔
خواجہ آصف کا مزید کہنا تھا کہ پاکستانی فورسز نے دہشتگردوں کا تعاقب کرتے ہوئے انہیں جہنم واصل کیا اور دہشتگردوں کی جانب سے کیے گئے حملے کے نتیجے میں 21 مسافر اور 4 سکیورٹی اہلکار شہید ہوئے۔ خواجہ آصف نے مزید کہا کہ اس آپریشن کے دوران پی ٹی آئی اور بھارتی میڈیا کی جانب سے جو بیانات اور پروپیگنڈا کیا گیا، وہ یکساں تھا، جس سے یہ واضح ہوتا ہے کہ دونوں نے ایک ہی مقصد کے تحت ملک کے خلاف بیان بازی کی۔خواجہ آصف نے کہا کہ افغانستان سے بھی سوشل میڈیا پر ایسی ہی زبان استعمال کی جا رہی تھی، جو قومی یکجہتی کے لیے خطرہ بن سکتی ہے۔ انہوں نے قوم سے اپیل کی کہ سیاسی مفادات سے بالاتر ہوکر ہم سب کو قومی وحدت کا مظاہرہ کرنا چاہیے تاکہ دشمن کے عزائم کو ناکام بنایا جا سکے۔
خیال رہے کہ گزشتہ روز یعنی منگل کو بلوچستان کے ضلع بولان میں دہشتگردوں نے پشاور جانے والی جعفر ایکسپریس پر حملہ کر دیا تھا اور متعدد مسافروں کو یرغمال بنا لیا تھا، جن میں خواتین اور بچے بھی شامل تھے۔ بعد ازاں فورسز نے طویل آپریشن کے ذریعے تمام 33 دہشتگردوں کو ہلاک کر دیا اور یرغمالیوں کو آزاد کروا لیا۔
