قطر: اسرائیل کیلئے جاسوسی کا الزام ،تمام بھارتی انجینئرز کو فارغ کرنے کا فیصلہ

نئی دہلی، دوحہ: قطرنے دہرا گلوبل کے ساتھ کنٹریکٹ منسوخ کرنے کا فیصلہ کرلیا ہے اور اس سلسلے میں تمام بھارتی ملازمین کو مستعفی ہونے کی ہدایت کردی گئی ۔یہ بھارتی ملازمین سب میرین پراجیکٹ پر کام کررہے تھے ۔
سنڈے گارڈین کے مطابق تقریباً 75بھارتی ملازمین کی اکثریت نیوی کے ریٹائرڈ ملازمین تھے، انہیں آگاہ کیاگیا ہے کہ 31مئی ان کی نوکری کا آخری د ن ہوگا۔قطر کے ورک ویزا کی شرائط و قوانین کی وجہ سے ان بھارتیوں کی اکثریت کو وطن واپس لوٹنا ہوگا۔بتایاگیا ہے کہ گزشتہ سال اگست میں قطر کی انٹیلی جنس ایجنسی کی طرف سے اسرائیل کیلئے مبینہ جاسوسی کے الزام میں بھارتی نیوی کے 8سابق ملازمین کی گرفتاری کے بعد سے دہرا گلوبل خبروںمیں تھی ،اس کیس کی اگلی سماعت تین مئی کو ہوگی جس دوران ممکنہ الزامات باضابطہ طورپر سامنے آنے کی توقع ہے، ان 8ملازمین کو بھی کمپنی نے نوکری سے فارغ کردیا۔
یہ بھی پڑھیں
قطر میں بھارتی بحریہ کے 8 ریٹائرڈ افسران کی پُراسرار گرفتاری
رپورٹ میں ذرائع کے حوالے سے بتایاگیا ہے کہ ایڈوانس سروسز اینڈ مینٹیننس نامی کمپنی دہرا گلوبل کی دفتری عمارت، کنٹریکٹس اور غیربھارتی ملازمین سمیت تمام اثاثو ں کا کنٹرول سنبھالنے جارہی ہے ۔
عما ن میں موجود ذرائع نے خبررساں ادارے کو بتایاکہ رائل عمان ایئرفورس کے ریٹائرڈ سکواڈرن لیڈر اور دہرا کے سی ای اوخامس العجمی ہی ایڈوانس سروسز اینڈ مینٹیننس کے پیچھے ہیں، وہ بھی بھارتی شہریوں کیساتھ قطری انٹیلی جنس ایجنسی کی طرف سے گرفتار ہوچکے ہیں لیکن نومبر میں انہیں رہا کردیا گیاتھا۔ذرائع بتاتے ہیں کہ بھارتی شہریوں کو کہا گیا ہے کہ گزشتہ سال اگست کے واقعے کے بعد قطری نیوی کیساتھ دہرا کا کنٹریکٹ منسوخ ہوگیا ہے اور اب ان کی ضرورت نہیں۔یہ بھی کہا جارہاہے کہ نئی کمپنی کے پاس برطانیہ، فرانس اور عمان کے باشندے ہیں جو قطری نیوی کی تربیت کے لیے بھارتی شہریوں کی جگہ لیں گے ۔