معروف گلوکار راحت فتح علی خان نے اپنے حالیہ انٹرویو میںکہا ہے کہ ہمارے ملک کے گلوکار بہت اعلی ہیں، ان کا مقابلہ تو پوری دنیا میں کسی سے نہیں کیا جا سکتا. انہوں نے کہا کہ نصرت فتح علی خان کی ہی مثال لے لیں ان جیسا گلوکار آج تک نہ پیدا ہوا ہے نہ ہی ہوگا. انہوں نے گائیکی کو ہر لحاظ سے نئی جہتوں سے متعارف کروایا. انہوں نے کہا کہ بھارت کی مارکیٹ بڑی ہے ، وہاں پاکستانی گلوکاروں کو یقینا فائدہ ہوتا ہے، میں سمجھتا ہوں کہ دونوںممالک کے تعلقات اچھے ہونے چاہیں ، تاکہ کاروباری سلسلہ شروع ہو سکے.
انہوں نے مزید یہ بھی کہا کہ جو لوگ اچھا کام کررہے ہیں دنیا میں ملک کا نام روشن کررہے ہیں وہ یقینا ہمارے پاکستان کا اثاثہ ہیں ان کی قدر کی جانی چاہیے. انہوں نے کہا کہ میں نے یہ دیکھا ہے کہ جو اچھا کام کررہا ہو اس کی تعریف میں ہچکچاہٹ سے کام لیا جاتا ہے ایسا نہیں ہونا چاہیے جو اچھا کام کررہا ہے اسکی ہر حال میں تعریف ہونی چاہیے. انہوں نے کہا کہ تعریف کرنے سے حوصلہ افزائی ہوتی ہے اور جس کی تعریف کی جاتی ہے وہ مزید اچھا کام کرنے کے لئے پرجوش ہوجاتا ہے.
