چین میں بارشوں نے تباہی مچادی:درجنوں ہلاک

بیجنگ: چین میں بارشوں نے تباہی مچادی:درجنوں ہلاک ،اطلاعات کے مطابق چین میں مسلسل ہونے والی بارشوں کے دوران لینڈ سلائیڈنگ اور مختلف واقعات اورحادثات میں درجنوں افراد ہلاک ہوچکے ہیں

عالمی خبر رساں ادارے کے مطابق چین کے صوبے ہوبئی میں بارشوں نے بڑے پیمانے پر تباہی مچادی جس کے دوران مختلف واقعات میں 27 افراد ہلاک اور متعدد زخمی ہوگئے۔

مسلسل بارشوں کے باعث ڈیم کے بند ٹوٹ گئے اور پانی رہائشی علاقوں میں داخل ہوگیا۔ سڑکیں تالاب کا منظر پیش کرنے لگیں۔ ٹرانسپورٹ اور بجلی کا نظام درہم برہم ہوگیا۔

ریسکیو آپریشن کے دوران 6 ہزار افراد کو محفوظ مقام پر منتقل کیا گیا۔ اسپتالوں میں ایمرجنسی نافذ کردی گئی۔ محکمہ موسمیات نے مزید بارشوں کی پیشن گوئی کی ہے۔

واضح رہے کہ گزشتہ ماہ بھی چین کے صوبے ہنان میں بارشوں کے بعد آنے والے سیلاب سے 300 سے زائد افراد ہلاک اور 500 سے زائد زخمی ہوگئے تھے۔