رانا ثناء کیخلاف منشیات کیس اے این ایف نے بنایا تھا۔ اسد عمر

تحریک انصاف کے رہنماء اور سابق وفاقی اسد عمر کا کہنا ہےکہ رانا ثنا اللہ کو کسی سیاسی کیس میں نہیں پکڑا تھا بلکہ  ان کے خلاف اے این ایف کے حاضر سروس افسروں نے کیس بنایا تھا۔

اسلام آباد  میں میڈیا سے گفتگو کرتے ہوئے اسد عمر نے کہا کہ  پنجاب کے ضمنی انتخابات کی تیاری زوروں پر ہے، عمران خان کی مقبولیت بڑھتی جارہی ہے، ہمارے لوگوں کو دھمکیاں مل رہی ہیں۔

انہوں نے کہا کہ کورٹ کے آرڈر کے مطابق پنجاب کی حکومت غیر آئینی ہے، پنجاب حکومت جانے کو تیار نہیں اور سرکاری مشینری استعمال ہورہی ہے۔

رانا ثنااللہ کیخلاف کیس غلط تھا، یہ پی ٹی آئی نے نہیں بنایا: فواد چوہدری

اسد عمر کا کہنا تھا کہ اینٹ سے اینٹ بجانے کا کہنے والے ابھی بھی حکومت کا حصہ ہیں، اداروں کے خلاف سب سے زیادہ بات کرنے والے خواجہ آصف وزیر دفاع بنے بیٹھے ہیں۔

انہوں نے مزید  کہا کہ پی ٹی آئی کی لڑائی کسی کی ذات کے خلاف نہیں بلکہ نا انصافی اور بیرونی مداخلت کے خلاف ہے۔

ایک سوال کے جواب میں سابق وزیر کا کہنا تھاکہ رانا ثنا اللہ کو کسی سیاسی کیس میں نہیں پکڑا تھا، ان کے خلاف اے این ایف کے حاضر سروس افسروں نے کیس بنایا تھا۔

انہوں نے مزید کہا کہ الیکشن کمیشن کو اچھا مشورہ ہے کہ ایک سیاسی جماعت کا انتخابی نشان خود کو بھی دے دیں کیونکہ کمیشن انصاف کرتا نظر نہ آیاتو  ملک مشکل کی طرف جائے گا۔

اسد عمر نے پبلک اکاؤنٹس کمیٹی میں خاتون کے الزامات سے متعلق لاعلمی کا اظہار کیا۔