رواں برس ریلیز ہونے والی بالی ووڈ کی پانچ فلمیں

عالمی وبا کورونا وائرس کی وجہ سے عائد پابندیاں ہٹنے کے بعد جہاں دنیا بھر میں کاروباری سرگرمیوں کا آغاز ہو چکا ہے، وہی دنیا بھر کے شائقین بھی اپنی پسندیدہ فلمیں دیکھنے کے لیے سینما گھروں کا رخ کرنے لگے ہیں-

باغی ٹی وی : بھارتی میڈیا کے مطابق بالی ووڈ میں بھی رونقیں لوٹنے لگیں مداح شوبز ستاروں کو بڑے پردے پر دیکھنے کے لیے بے چین ہیں اور ان کو اپنے پسندیدہ ستاروں کی فلموں کا شدت سے انتظار ہر-

ذیل میں رواں سال ریلیز ہونے والی ان پانچ بڑی فلموں کا ذکر ہے جن پر سب کی نگاہیں جمی ہوئی ہیں تاہم بھارتی میڈیا کے مطابق ان فلموں کی ریلیز میں متعدد وجوہات کی بنا پر تاخیر بھی ہو سکتی ہے۔

1: اٹیک: ایکشن سے بھرپور یہ فلم یکم اپریل کو سینما گھروں کی زینت بنے گی فلم کی کہانی ہے انڈیا کے پہلےسولجر کی، جس کا کردار اداکار جان ابراہیم نبھا رہے ہیں ان کے ساتھ اداکارہ جیکولین فرنینڈس بھی مرکزی کردار ادا کر رہی ہیں۔

2: جرسی: اداکار شاہد کپور کی یہ سپورٹس ڈرامہ فلم 14 اپریل کو ریلیز ہوگی فلم میں شاہد کرکٹر کے کردار میں نظر آئیں گے جو صرف اپنے بیٹے کی خاطر اس کھیل میں واپس آتے ہیں۔

3: رن وے 34: اجے دیوگن اور امیتابھ بچن کی یہ سسپنس سے بھرپور فلم 29 اپریل کو بڑے پردے کی زینت بنے گی ’رن وے 34‘ ایک پائلٹ کے ساتھ ہونے والے حادثے کی کہانی ہے (جس کا کردار اجے دیوگن ادا کر رہے ہیں) جو اصولوں کی پابندی نہیں کرتا اس میں امیتابھ بچن ایک تحقیقاتی افسر کا کردار ادا کر رہے ہیں جو اس افسوسناک حادثے کے اصل محرکات کی تلاش میں ہے۔

4: بھول بھلیاں 2: 2007 کی کامیاب ہارر کامیڈی ’بھول بھلیاں‘ کا سیکوئل ’بھول بھلیاں 2‘ کے نام سے 20 مئی کو ریلیز ہوگا۔ فلم میں مرکزی کردار اداکار کارتک آریان ادا کر رہے ہیں۔

5: پرتھوی راج: گذشتہ کئی سالوں سے بالی وڈ میں تاریخی موضوعات پر فلمیں بنانے کا سلسلہ جاری ہے، اور اب اس حوالے سے نئی آنے والی فلم ’پرتھوی راج‘ ہے جس میں اداکار اکشے کمار ماضی کے ایک جنگجو بادشاہ کا کردار ادا کر رہے ہیں۔ فلم تین جون کو سینما گھروں میں ریلیز ہوگی۔