روز ویلٹ ہوٹل میں امریکی صدر ٹرمپ بھی دلچسپی رکھتے ہیں
باغی ٹی وی :قومی اسمبلی کی قائمہ کمیٹی برائے نجکاری میں یہ بات سامنے آئی ہے کہ ماضی میں ڈونلڈ ٹرمپ پی آئی اے کے امریکہ میں موجود ” روز ویلٹ “ ہوٹل خریدنے میں دلچسپی رکھتے تھے اور اب بھی رکھتے ہیں ۔
قومی اسمبلی کی قائمہ کمیٹی برائے نجکاری کا اجلاس ہوا جس دوران پی آئی اے کی کارکردگی اور امریکہ میں روز ویلٹ ہوٹل کے معاملات پر غور کیا گیا ۔ اجلاس کے دوران ایم ڈی پی آئی اے انویسٹمنٹس لیمیٹڈ نے بتایا کہ ماضی میں امریکی صدر ڈونلڈ ٹرمپ روز ویلٹ کو خریدنے میں دلچسپی رکھتے تھے اور وہ اب بھی دلچسپی رکھتے ہیں.
سلام آباد ہائی کورٹ میں ڈپٹی اٹارنی جنرل راجہ خالد محمود نے عدالت کو یقین دہانی کروائی ہے کہ وفاقی حکومت امریکہ کے شہر نیو یارک میں پاکستان انٹرنیشنل ائیر لائن کی ملکیت روز ویلٹ ہوٹل کی نجکاری یا فروخت نہیں کر رہی۔
بدھ کے روز اسلام آباد ہائی کورٹ میں جسٹس عامر فاروق نے پی آئی اے کے نیو یارک میں روز ویلٹ ہوٹل کی نجکاری کے خلاف درخواست کی سماعت کی۔ ڈپٹی اٹارنی جنرل نے عدالت کو آگاہ کیا کہ یہ صرف اخباری خبریں ہیں، ایسا کچھ بھی نہیں کیا جا رہا۔
درخواست گزار کے وکیل نے اعتراض کرتے ہوئے کہا وزیراعظم کے معاون خصوصی زلفی بخاری اپنے فرنٹ مین کے زریعے ہوٹل روز ویلٹ کو لینا چاہتے ہیں اور وہ پاکستانی شہری بھی نہیں نہ ہی منتخب نمائندہ ہیں۔
ڈپٹی اٹارنی جنرل نے کہا کہ زلفی بخاری پاکستانی شہری ہیں لیکن دوہری شہریت کے حامل ہیں۔ حکومت ایڈوائزرز مقرر کر رہی ہے اور فیزیبیلٹی تیار کر رہی ہے کہ کیسے ہوٹل کو منافع بخش بنایا جائے۔
جسٹس عامر فاروق نے ریمارکس دیے کہ یہ قومی اثاثہ ہے کسی کا ذاتی مفاد نہیں ہونا چاہیے۔ عدالت نے حکومت کی روز ویلٹ ہوٹل فروخت یا نجکاری نہ کرنے کی یقین دہانی پر درخواست نمٹا دی۔
عدالت نے درخواست گزار کو ہدایت کی کہ اگر حکومت نے نجکاری یا فروخت کرنے کا فیصلہ کیا تو دوبارہ رٹ دائر کر سکتے ہیں۔
خیال رہے کہ امریکہ میں پی آئی اے کی ملکیت ہوٹل روز ویلٹ کی نجکاری کا معاملہ وفاقی کابینہ میں آنے کے بعد اسلام آباد ہائی کورٹ میں درخواست دائر کی گئی تھی۔
