راولپنڈی؛ 24 گھنٹوں میں مزید 41 ڈینگی مریضوں کا اندراج، تعداد 871 ہوگئی
وفاقی دارالحکومت کے جڑواں شہر میں ڈینگی وائرس کے شہریوں پر حملے جاری جاری ہیں، جس کے نتیجے میں گزشتہ 24 گھنٹوں میں 41 ڈینگی مریضوں کا اندراج کیا گیا جب کہ مجموعی طور پر یہ تعداد 871 ہو چکی ہے۔
اسپتال ذرائع کے مطابق بینظیر بھٹو جنرل اسپتال اور ہولی فیملی اسپتال میں 4 مریضوں کی حالت تشویش ناک ہے۔ بینظیر بھٹو جنرل اسپتال میں 78 ، ہولی فیملی میں 60 اور ڈسٹرکٹ ہیڈ کوارٹر اسپتال میں 59 مریض داخل ہیں۔تینوں بڑے اسپتالوں میں کل 197 مریض زیر علاج ہیں۔ محکمہ صحت کا کہنا ہے کہ مریضوں کی اکثریت کا تعلق دھاماں سیداں، چک جلال دین سے ہے۔ اب تک ڈینگی سے متاثر ایک مریض کی موت ہوچکی ہے جب کہ انسداد ڈینگی مہم میں فوگنگ ، اسپرے اور لاروا سرویلنس جاری ہیں۔
واضح رہے کہ باغی ٹی وی نے اس بارے ایک خبر دی تھی جس میں بتایا گیا تھا کہ: "ڑواں شہروں میں ڈینگی وائرس کے مریضوں کی تعداد میں مسلسل اضافہ ہو رہا ہے۔ حکام کے مطابق ایک شہری جاں بحق اور 135 نئے مریض رپورٹ ہوئے ہیں۔
ڈسٹرکٹ ہیلتھ آفیسر کے مطابق اسلام آباد میں گزشتہ 24 گھنٹوں کے دوران ڈینگی سے ایک اور شہری جاں بحق ہوگیا جب کہ 97 نئے مریض رپورٹ ہوئے۔ دیہی علاقوں میں 34 جب کہ شہری علاقوں میں 63 کیسز رپورٹ ہوئے ہیں۔ ڈی ایچ او زعیم ضیا کے مطابق اسلام آباد میں مجموعی طور پر ڈینگی کے 320 کیسز رپورٹ ہوئے ہیں، جس میں سوہان کے علاقے میں سب سے زیادہ کیسز رپورٹ ہوئے۔
دوسری جانب راولپنڈی میں انسداد ڈینگی کاروائیاں جاری ہیں۔ اس دوران حکام نے ڈینگی لاروا برآمد ہونے پر 9 مقامات سیل کرکے 25 افراد کے خلاف مقدمات درج کرلیے ہیں۔ علاوہ ازیں نکاسی آب کے ناقص انتظامات پر 34 دکانوں کے مالکان کو بھی جرمانے عائد کیے گئے ہیں۔ ضلعی انتظامیہ کے مطابق گزشتہ روز ڈینگی کے 38 نئے کیسز رپورٹ ہوئے۔ ہاٹ سپاٹ ایریاز میں میڈیکل لیب پوری طرح فعال ہیں۔ شہر بھر میں فوگنگ اور سرویلنس کے عمل کو مزید تیز کیا گیا ہے۔ شہری انسداد ڈینگی ایس او پیز پر عمل کرتے ہوئے انتظامیہ سے تعاون کو مکمل طور پر یقینی بنائیں۔
حکام کے مطابق بینظیر بھٹو جنرل اسپتال میں 44 مریض داخل ہیں، جن میں سے 30 میں ڈینگی کی تصدیق ہوئی ہے جبکہ ہولی فیملی میں 60 مریضوں میں سے 24میں ڈینگی کی تصدیق ہوچکی ہے۔ ڈسٹرکٹ ہیڈ کوارٹر اسپتال میں 44 مریض ہیں، جن میں سے 25 میں ڈینگی کی تصدیق ہوگئی ہے۔ رواں برس اب تک ڈینگی کا شکار ہونے والوں کی تعداد 677 ہوچکی ہے محکمہ صحت کے مطابق دھاماں سیداں،گرجا اور چک جلال دین میں ڈینگی کا زور ہے اوران ہائی رسک یونین کونسلوں میں فوکس انسداد ڈینگی مہم منظم انداز میں جاری ہے۔”
