سال نو کے آغاز پر کتنے بچے پیدا ہوئے اور کون سا ملک سب سے آگے رہا ، اہم رپورٹ
باغی ٹی وی رپورٹ کے مطابق اقوام متحدہ کے بہبود اطفال کے ادارے یونیسیف نے نئی دہائی اور نئے سال کے آغاز پر دنیا بھر میں بچوں کی پیدائش سے متعلق چند خوش آئند اعداد و شمار پیش کیے ہیں۔ یونیسیف کے مطابق یکم جنوری 2020 کو دنیا بھر میں تین لاکھ 92 ہزار بچوں کی پیدائش ہوئي ہے۔ ساوتھ ایشین وائرکے مطابق اس ادارے کے مطابق عالمی سطح پر نومولود بچوں کے بارے میں یہ بات افسوس ناک ہے کہ ان میں سے بہت سے کم عمری میں ہی انتقال کر جائیں گے۔
مگر تصویر کا دوسرا اور کافی حد تک خوش کن پہلو یہ ہے کہ نومولود بچوں کے زندہ رہنے کے حوالے سے بین الاقوامی سطح پر آج کی صورت حال تین عشرے پہلے کے مقابلے میں بہت بہتر ہو چکی ہے۔ ان 30 برسوں میں ان نومولود بچوں کی تعداد میں نصف سے زائد کی کمی ہو چکی ہے، جو پانچ سال کی عمر تک پہنچنے سے پہلے ہی انتقال کر جاتے تھے۔ تاہم اس مثبت پیش رفت کے باوجود یہ بات بھی درست ہے کہ انہی تین دہائیوں میں نومولود بچوں کی بہبود اور ان کی بقا کے حوالے سے جو بہتری دیکھنے میں آئی ہے، وہ قدرے سست رفتار رہی ہے۔
2018 اپنی زندگی کے پہلے ہی مہینے میں انتقال کر جانے والے نوزائیدہ بچوں کی تعداد 25 لاکھ رہی تھی۔ ان میں سے بھی ایک تہائی بچے تو اپنی زندگی کے پہلے ہی دن موت کے منہ میں چلے گئے تھے۔ المیہ یہ ہے کہ ایسی لاکھوں میں سے زیادہ تر اموات کی وجوہات ایسی تھیں کہ ان بچوں کی جانیں بچائی جا سکتی تھیں مگر ایسا ہو نہ سکا۔
یونیسیف کے اعداد و شمار کے مطابق 2018 میں پیدائش کے بعد پہلے ہی مہینے میں انتقال کر جانے والے بچوں کی شرح پانچ سال سے کم عمر کی بچوں کی مجموعی اموات کے 47 فیصد سے بھی زیادہ رہی تھی جبکہ یہی شرح 1990 میں 40 فیصد تھی۔
جنوری 2020 کے دن اقوام متحدہ کے بچوں کے ادارے نے ماں اور نومولود بچوں کے لیے حفظان صحت اور طبی دیکھ بھال کی بہتر سہولیات کی فراہمی پر زور دیا ہے۔ یونیسیف کے مطابق نو مولود بچوں کی زیادہ تر اموات کی وجہ ضروری طبی آلات سے لیس تربیت یافتہ نرسوں اور مڈوائیوز کی کمی بنتی ہے۔ بھارت میں پیدا ہونے والے بچوں کی تعداد دنیا میں سب سے زیادہ
دنیا بھر میں جنوری 2020 کو جتنے بچوں کی پیدائش ہوئي ہے، ان میں سے کسی ایک ملک کے طور پر سب سے زیادہ تعداد بھارت میں جنم لینے والے بچوں کی ہے ۔ بھارت اپنی آبادی کے لحاظ سے دنیا کا دوسرا سب سے بڑا ملک ہے۔ عالمی آبادی میں بھارتی شہریوں کا موجودہ تناسب 17.7 فیصد بنتا ہے۔
یونیسیف کی نئے سال اور نئے عشرے کے پہلے دن دنیا بھر میں بچوں کی مجموعی پیدائش کے حوالے سے جاری کردہ رپورٹ میں کہا گیا ہے کہ یکم جنوری کو تقریبا ساڑھے 67 ہزار بچوں کی پیدائش کے ساتھ بھارت سب سے آگے ہے، جس کے بعد 46 ہزار 300 نومولود بچوں کے ساتھ چین دوسرے اور 26 ہزار بچوں کی متوقع پیدائش کے ساتھ افریقی ملک نائجیریا تیسرے نمبر پر ہے ۔ ان تین ممالک کے بعد پاکستان اس فہرست میں تقریبا 16 ہزار 800 بچوں کے ساتھ چوتھے نمبر پر ہے۔ پاکستان کے بعد انڈونیشیا پانچویں نمبر پر ہے، جہاں آج مجموعی طور پر 13 ہزار سے زائد بچے جنم لیں گے۔ ان ممالک کے علاوہ آج یکم جنوری ہی کے دن امریکا میں تقریبا ساڑھے 10 ہزار، کانگو میں سوا 10 ہزار اور ایتھوپیا میں تقریبا ساڑھے آٹھ ہزار بچوں کی پیدائش ہوئي جبکہ امریکہ میں پیدائش کی شرح ایک صدی میں سب سے کم رہی جس کا تناسب 0.5% سے بھی کم رہا جس کی اہم وجوہات میں پیدائش کی شرح میں کمي ، شرح اموات میں اضافہ اور بین الاقوامی سطح پر ہجرت کا سلسلہ کم ہونے کو قرار دیا جارہا ہے ۔
