بالی وڈ اداکار سنجے دت اور اداکارہ عالیہ بھٹ کی آنے والی رومانٹک تھرلر فلم ’سڑک 2‘ کے ٹریلر کی ویڈیو بھارت میں ناپسند کی جانے والی یوٹیوب کی پہلی ویڈیو بن گئی۔

باغی ٹی وی : مہیش بھٹ کی ڈرائریکشن میں بنائی گئی سنجے دت اور عالیہ بھٹ کی ’سڑک 2‘ کے ٹریلر رواں ماہ 12 اگست کو ہی ریلیز کیا گیا تھا اور اس نے دیکھتے ہی دیکھتے ناکامی کا نیا ریکارڈ اپنے نام کرلیا۔

بھارتی اخبار انڈیا ٹوڈے کے مطابق 15 اگست تک ’سڑک 2‘ کے ٹریلر کی ویڈیو بھارت میں ناپسند کی جانے والی یوٹیوب کی پہلی ویڈیو بن گئی ہے-

عالیہ بھٹ، ادیتیہ رائے کپور، سنجے دت اور پوجا بھٹ کی کاسٹ پر مبنی فلم کےٹریلر کی ویڈیو یوٹیوب پر ناپسند کی جانے والی دنیا کی تیسری بڑی ویڈیو بھی بن گئی۔

’سڑک 2‘ سے آگے صرف دو ہی ویڈیوز ایسی ہیں جنہیں یوٹیوب پر سب سے زیادہ ناپسند کیا گیا ہے۔

مذکورہ دو ویڈیوز میں دوسرے نمبر پر کینیڈ ین پاپ اسٹار جسٹن بیبر کے گانے بے بی کی ویڈیو ہے جسے 2010 میں ریلیز کیا گیا تھا۔

تاہم 18 اگست تک ’سڑک 2‘ نے جسٹن بیبر کے گانے کا ریکارڈ بھی توڑ دیا۔

جسٹن بیبر کی ویڈیو نے گزشتہ ایک دہائی 18 اگست تک یوٹیوب پر ایک کروڑ 10 لاکھ ڈس لائیک حاصل کیے ہیں تاہم سڑک 2 کے ٹریلر کی ویڈیو محض 7 دنوں میں ہی 18 اگست تک یوٹیوب پر ایک کروڑ 10 لاکھ ڈس لائیک حاصل کر کے گلوکار کے گانے سے آگے نکل گئی-

جسٹن بیبر کے گانے اور ’سڑک 2‘ کے ٹریلر سے آگے یوٹیوب کی 2018 میں جاری کی گئی اپنی روائنڈ ویڈیو ہے، جسے اب تک ایک کروڑ 80 لاکھ بار ناپسند کیا جا چکا ہے-

اس طرح سڑک 2 دنیا بھر میں ناپسند کی جانے والی دوسری ویڈیو بن گئی ہے-

اس سے قبل پاکستانی لیجنڈری گلوکار سلیم جاوید کے بیٹے ہدایتکار، گلوکار اور پروڈیوسر شیزان سلیم نے دعویٰ کیا ہے کہ فلم سڑک 2 کے ٹریلر میں سنائی دینے والا گانا ’عشق کمال‘ اُن کے 11 سال قبل پروڈیوس کیے گانے ’ربا ہو‘ کا چربہ ہے-

واضح رہے کہ ’سڑک 2‘ کو سوشانت سنگھ کی خودکشی کے بعد تنقید کا نشانہ بنایا جا رہا ہے اور فلم ساز مہیش بھٹ پر الزام لگایا جا رہا ہے کہ انہوں نے فلم میں اقربا پروری کے فروغ کو ثابت کیا کیونکہ خبریں تھیں کہ ابتدائی طور پر مہیش بھٹ نے سڑک 2 کے لیے سوشانت سنگھ کو کاسٹ کرنے کا وعدہ کیا تھا لیکن انہوں نے اسے پورا نہیں کیا۔

تاہم مہیش بھٹ نے گزشتہ ماہ ممبئی پولیس کو دیے گئے بیان میں واضح کیا تھا کہ انہوں نے سشانت سنگھ کو سڑک 2 میں کاسٹ نہیں کیا تھا اور نہ ہی اس حوالے سے کوئی بات ہوئی تھی۔

یاد رہے کہ بھارتی فلم سڑک2 آج سے 20 سال پہلے بنائی جانے والی فلم ’سڑک‘ کا سیکوئل ہے، اس فلم کو بھارتی ہدایتکار مہیش بھٹ نے ڈائریکٹ کیا اور فلم کے مرکزی کرداروں میں سنجے دت، پوجا بھٹ، عالیہ بھٹ اور ادیتیہ رائے کپور شامل ہیں۔

سڑک 2 کو رواں ماہ 28 اگست کو ویب اسٹریمنگ ویب سائٹ ڈزنی ہوٹ اسٹار پر ریلیز کیا جائے گا۔

مہیش بھٹ کی نئی فلم سڑک 2 کا گانا پاکستانی گانے کی کاپی نکلا