محکمہ ایریگیشن نصیر آباد کرپشن کا گڑھ بن چکا ہے
بھل صفائی کی مد میں کروڑوں روپے خورد برد کر لیے گئے ہیں
سابق صوبائی وزیر میر صادق عمرانی کا دعویٰ
ڈیرہ مراد جمالی(منصور مگسی) پاکستان پیپلز پارٹی کی سینٹرل ایگزیکٹو کمیٹی کے رکن اور سابق صوبائی صدر و سابق صوبائی وزیر میر محمد صادق عمرانی نے دعویٰ کیا ہے کہ محکمہ آبپاشی نصیر آباد میں پٹ فیڈر کینال کی بھل صفائی کے فیول کی مد میں کروڑوں روپے کی کرپشن کی گئی ہے ان خیالات کا اظہار انہوں نے اپنے جاری کردہ ایک پریس ریلیز میں کیا ہے میر صادق عمرانی نے یہ بھی دعویٰ کیا ہے کہ محکمہ ایریگیشن میں سیکڑوں ملازمین کو میرٹ کے برعکس بھرتی کیا گیا ہے جس میں محکمہ خزانہ کی مبینہ ملی بھگت شامل ہے انہوں نے کہا کہ وفاقی بجٹ میں پٹ فیڈر کینال کی صفائی کیلئے 62 ارب روپے منظور کر لیے گئے ہیں ہمیں خدشہ ہے کہ یہ رقم بھی ماضی کی طرح کرپشن کی نذر ہو جائے گی انہوں نے چیئرمین نیب اور ڈی جی نیب سے مطالبہ کیا ہے کہ محکمہ ایرگیشن نصیر آباد میں ہونے والی کروڑوں روپے کی مبینہ کرپشن کی اعلیٰ سطحی اور غیر جانبدارانہ تحقیقات کرائی جائے