کراچی (باغی ٹی وی ) عدالت نے اپنی سگی بیٹی کو متعدد بار جنسی زیادتی کا نشانہ بنانے والے درندے صفت باپ کو 25 سال قید کی سزا سنائی ہے۔ ایڈیشنل ڈسٹرکٹ اینڈ سیشن جج وسطی کی عدالت نے ملزم پر دو لاکھ روپے جرمانہ بھی عائد کیا اور دھمکیاں دینے کے جرم میں مزید 7 سال قید بامشقت کی سزا سنائی۔
پراسیکیوٹر حنا ناز کے مطابق ملزم نے 2020 میں اپنی بیٹی کو پہلی بار جنسی زیادتی کا نشانہ بنایا اور پھر یہ سلسلہ چلتا رہا۔ بیٹی نے اپنی ماں کو اس بارے میں بتایا، لیکن ماں نے کوئی کارروائی نہیں کی۔ چند ماہ بعد متاثرہ لڑکی نے ایک بچے کو جنم دیا اور ماں کو بتایا کہ بچے کا باپ اس کا اپنا شوہر ہے۔ اس انکشاف پر ماں نے اپنے شوہر (لڑکی کے باپ) کو مارا پیٹا۔
متاثرہ لڑکی نے فیس بک پر دوستی کے دوران وارث نامی شخص کو یہ ساری کہانی بتائی۔ وارث نے لڑکی سے شادی کرنے کی رضامندی ظاہر کی اور شادی کے بعد متاثرہ لڑکی نے اپنے شوہر وارث کے ساتھ مل کر اپنے باپ کے خلاف تھانہ نیو کراچی میں مقدمہ درج کروایا۔ عدالت میں لڑکی نے اپنے باپ کو ملزم قرار دیا اور عدالت نے ڈی این اے ٹیسٹ کے ذریعے جرم ثابت ہونے پر ملزم کو سزا سنائی۔
سماجی حلقوں کا کہنا ہے کہ اس فیصلہ سےنہ صرف متاثرہ لڑکی کو انصاف ملا بلکہ معاشرے میں ایسے گھناؤنے جرائم کے خلاف ایک مضبوط پیغام بھی ہے۔
