سجاد علی کا 1986ء میں ریلیز ہونے والا گیت صارفین کو پھر سے بھا گیا

پاکستان میوزک انڈسٹری کے مقبول ترین گلوکار سجاد علی کا مشہور زمانہ گیت ’ دھواں ‘ 35 سال بعد صارفین کو پھر سے بھا گیا۔

باغی ٹی وی : گلوکار سجاد علی کا 1986ء میں ریلیز ہونے والا گیت ’دھواں‘ اپنے دور کا مقبول ترین گیت سمجھا جاتا تھا اور اُن کے کیریئر کے بہترین گیتوں میں شمار کیا جاتا تھا لیکن اب نئے انداز کے ساتھ پیش کیے جانے والے اس گیت نے پھر سے مداحوں کے دل جیت لئے ہیں-

ایک برانڈ کی جانب سے ماضی کے مشہور گیتوں کو ری مکس کرکے پیش کیا جا رہا ہے اس بار ماضی کا گیت ’دھواں‘ بھی نئے ورژن کے ساتھ پیش کیا گیا ہے جس میں اس بار بھی سجاد علی نے اپنی آواز کا جادو جگایا ہے۔

اس حوالے سے انہوں نے ایک ویب سائٹ کو دیئے گئے انٹرویو میں کہا کہ میں ماضی کا وہ گیت پھر گا رہا ہوں جو میں نے 35 سال قبل گایا تھا لیکن اس بار یہ گیت موجودہ دور کے میوزک کے ساتھ پیش کیا ہے۔

واضح رہے کہ اس گیت کو یوٹیوب پر 3 روز قبل ریلیز کیا گیا ہے جس اب تک 80 ہزار سے زائد بار دیکھا جا چکا ہے۔