وزیراعلیٰ بلوچستان میر عبدالقدوس بزنجو نے کہا ہے کہ سانحہ سول ہسپتال کے شہید وکلا کا غم آج بھی ہمارے دلوں میں تازہ ہے۔
سانحہ سول ہسپتال کے شہید وکلا کی چھٹی برسی کے موقع پر اپنے پیغام میں انہوں نے کہا کہ بزدل دہشت گردوں نے ہمارے معاشرے کے پڑھے لکھے اور باشعور طبقے کو بربریت کا نشانہ بنایا،
وزیراعلئ نے کہا کہ ملک دشمنوں نے ہمارے دلوں پر وار کیا ،صوبے کے عوام اور حکومت شہداء کے لواحقین کے غم میں برابر کے شریک ہیں، شہدا کا غم آج بھی ہمارے دلوں میں تازہ ہے،سانحہ میں ملوث دہشت گردوں اور ان کے سرپرستوں کو کیفرکردار تک پہنچایا گیا ہے،سانحہ میں ہم سے بچھڑنے والے شہید وکلا کی یادوں کو یقیناً کبھی بھلایا نہیں جاسکتا،
انہوں نے کہا کہ بلوچستان کے وکلا کا شمار ملک کے بہترین وکلا میں ہوتا ہے ،ہمارے وکلاء شعبہ قانون اور قانونی امور سے متعلق بہتر آگاہی اور ادراک رکھتے ہیں ،نوجوان وکلا کو اسکالرشپ پر بیرون ممالک اعلیٰ تعلیم کی فراہمی کے پروگرام پر عملدرآمد جاری ہے۔
وزیر اعلی نے کہا کہ حکومت بلوچستان نے پاکستان بار کونسل ،بلوچستان بار کونسل اور تمام ضلعی بار ایسوسی ایشن کے لئے خصوصی گرانٹ ان ایڈ دی ہے،ہمارا مقصد وکلا کو بہترین سہولیات کی فراہمی ہے ۔ انہوں نے کہا کہ فلاحی معاشرے کے قیام کے لئے امن ناگزیر ہے ،امن کے قیام سے معاشرے کے تمام طبقات بلاخوف وخطر اپنے شعبوں میں مثبت اور تعمیری کردار ادا کر سکیں گے۔
