پاکستان کی حکومت نے اسلام آباد میں واقع سیکٹر ایف ایٹ-ایف نائین انٹرچینج کو ترکیہ کے صدر عزت مآب رجب طیب ایردوان کے نام سے منسوب کرنے کا اعلان کیا ہے۔
اس حوالے سے ایک سادہ اور پروقار تقریب وزیراعظم ہاؤس میں منعقد کی گئی، جس میں ترکیہ کے صدر رجب طیب ایردوان اور پاکستان کے وزیر اعظم محمد شہباز شریف نے شرکت کی۔ اس تقریب میں رجب طیب ایردوان انٹرچینج کی تختی کی نقاب کشائی کی گئی۔یہ انٹرچینج جناح ایونیو اور آغا شاہی ایونیو کے سنگم پر واقع ہے اور حالیہ برسوں میں ریکارڈ مدت میں مکمل کیا گیا۔ اس انٹرچینج کا مقصد شہر کی ٹریفک کی روانی کو بہتر بنانا اور دونوں اہم ایونیو کی رابطے کو مزید موثر بنانا ہے۔ اس منصوبے کی تکمیل سے اسلام آباد میں ٹریفک کے نظام میں بہتری متوقع ہے اور شہریوں کو آسانی ہوگی۔
پاکستان اور ترکیہ کے درمیان تاریخی تعلقات کو مزید مستحکم کرنے کی ایک اور علامت کے طور پر یہ انٹرچینج ترکیہ کے صدر کے نام پر منسوب کیا گیا ہے، جو دونوں ممالک کے مابین مضبوط دوطرفہ تعلقات کا عکاس ہے۔ وزیر اعظم پاکستان نے اس موقع پر ترکیہ کے صدر کو شکریہ ادا کیا اور کہا کہ ان کے دورہ پاکستان سے دونوں ممالک کے روابط مزید مستحکم ہوں گے۔رجب طیب ایردوان نے اس اقدام کو دونوں ممالک کے درمیان دوستی کی ایک نئی علامت قرار دیا اور کہا کہ ترکیہ ہمیشہ پاکستان کے ساتھ کھڑا رہے گا۔
