وزیراعظم شہباز شریف کی زیر صدارت ملک میں سیلاب کی صورتحال اور سیلاب زدگان کے لئے امداددی کاروائیوں پر جائزہ اجلاس منعقد ہوا.
وزیراعظم شہباز شریف نے سیلاب زدہ علاقوں میں نظام زندگی کی بحالی کے لیے نظام مواصلات، بجلی کی ترسیل اور دیگر امدادی کارروائیوں کو مزید موثر بنانے کیلیے ضروری اقدامات کرنے کی ہدایت کی۔
وزیراعظم شہباز شریف نے سیلاب زدہ علاقوں میں اشیائےضروریہ اور اشیائےخورد و نوش کی فراہمی کو یقینی بنانے کی خصوصی ہدایت کی.
وزیراعظم شہباز شریف نے سیلابی صورتحال کے پیش نظر صوبائی حکومتوں کے ساتھ بھرپور تعاون کرتے ہوئے سڑکوں کی بحالی کے لیے جلد از جلد خصوصی اقدامات کرنے کی ہدایت کی۔ مزید برآں وزیراعظم شہباز شریف نے صوبوں کو درپیش دیگر مسائل کے حل کے لیےجامع حکمت عملی وضع کرنے کی ہدایت کی۔
اجلاس میں وفاقی وزیر برائے خزانہ مفتاح اسماعیل, وفاقی وزیر برائے اقتصادی امور ڈویژن سردار ایاز صادق, وفاقی وزیر برائے اطلاعات و نشریات مریم اورنگزیب, وفاقی وزیر برائے پلاننگ اینڈ ڈویلپمنٹ احسن اقبال,وفاقی وزیر برائے ریلویز خواجہ سعد رفیق, چیئرمین این ڈی ایم اے لیفٹیننٹ جنرل اختر نواز، چیئرمین NFRCC میجر جنرل ظفر اقبال اور دیگر اعلیٰ حکام نے شرکت کی۔
علاوہ ازیں وزیرِ اعظم شہباز شریف نے دادو میں سیلابی ریلے سے گرڈ اسٹیشن کو بچانے کی فوری ہدایات جاری کر دیں،دادو و گردو نواح کے علاقوں میں سیلابی صورتحال، 500KV گرڈ اسٹیشن کو خطرے کی خبر پر وزیرِ اعظم شہباز شریف نے فوری نوٹس لے لیا.
وزیرِ اعظم نے اعلی سول و فوجی قیادت کو تمام تر وسائل بروئے کار لا کر گرڈ اسٹیشن کو سیلاب سے بچانے کی ہدایت کی،وزیرِ اعظم کی ہدایات پر عملدرآمد کرتے ہوئے مورو شہر سے تین ایکسکویٹر روانہ کردئے گئے. وزیرِ اعظم سیلاب سے متاثرہ انفراسٹرکچر کے بچاؤ و بحالی کے کام کی 24 گھنٹے خود نگرانی کر رہے ہیں.
وزیرِ اعظم نے کہا کہ گرڈ اسٹیشن کا بچاؤ بجلی کی بلا تعطل فراہمی کیلئے نہایت ضروری ہے، گرڈ اسٹیشن کو فوری طور پر سیلاب سے متاثر ہونے سے بچایا جائے.
