پشاور:عوامی نیشنل پارٹی نے سینیٹر ستارہ ایاز کی پارٹی رکنیت ختم کردی ہے۔ اس بات کا اعلان باچا خان مرکز پشاور سے جاری کردہ اعلامیہ میں کیا گیا ہے۔ سنیٹر ستارہ آیاز پر پارٹی میں گروپ بندی کرنے اور تنظیموں سے بغاوت کرنے کے الزامات عائد کیے گئے تھے۔ اے این پی کی خاتون سینیٹر کو پارٹی قواعد و ضوابط کے خلاف سرگرمیوں پر شوکاز جاری کیا گیا تھا۔
جبکہ دوسری طرف سینیٹر سارہ ایازکے قریبی حلقوں کا کہنا ہے کہ وہ خود ہی پارٹی میں نہیں رہنا چاہتی تھی، اس کے علاوہ یہ بھی الزام لگایا گیا ہے کہ سینیٹر نےچیئرمین کے الیکشن میں پارٹی پالیسی کے خلاف ووٹ دیا ،اے این پی کی جانب سے جاری کردہ اعلامیہ کے مطابق سینیٹر ستارہ ایاز کو کابینہ اراکین کی موجودگی میں پرسنل ہیئرنگ کا موقع فراہم کیا گیا لیکن وہ صوبائی صدراور کابینہ اراکین کو تسلی بخش جواب نہ دے سکیں۔
ذرائع کے مطابق اے این پی کے صوبائی صدر نے پارٹی آئین اور قواعد و ضوابط کے تحت سینیٹر ستارہ ایاز کی پارٹی رکنیت ختم کردی ہے۔باچا خان مرکز پشاور سے جاری کردہ اعلامیہ کے مطابق آج کے بعد سنیٹر ستارہ آیاز کا پارٹی سے کوئی تعلق باقی نہیں رہا ہے۔
