لاہور کی سیشن کورٹ میں وکلاءاور سائلین کی سہولت کیلئے ایف آئی آر سیکشن قائم کر دیا گیا۔ جس میں خصوصی طور پر تیار کردہ سافٹ وئیر کی مدد سے ایف آئی آر کا حصول آسان ہو جائے گا اور اب وکلا ءاور سائلین کو ایف آئی آر کی نقول کے لیے اب پولیس تھانوں کے چکر نہیں کاٹنا پڑیں گے۔ گذشتہ روزڈسڑکٹ اینڈ سیشن جج لاہور قیصر نذیربٹ نے سیکشن کا باقاعدہ افتتاح کردیا۔ افتتاح کورونا خدشات کے باعث انتہائی سادگی کے ساتھ کیا گیا، اس موقع پر سافٹ وئیر کے انچارج ایڈیشنل سیشن جج معین کھوکھر نے سیشن جج لاہوراورصدرلاہوربار ایسو سی ایشن کوسافٹ ویئربارے بریفنگ دی،،سیشن جج لاہور نے کہا کہ وکلاءاور سائلین کی سہولت کے لیے اس سافٹ وئیر کو انسٹال کیا گیا ہے، وکلاءاور سائلین تھانوں میں جانے کی بجائے سیشن عدالت سے متعلقہ درج ہونے والی ایف آئی آر کی کاپی حاصل کرسکتے ہیں، اس سے کرپشن کا بھی خاتمہ ہوگا۔صدر لاہور بار جی اے خان طارق نے کہا کہ ایڈیشنل سیشن جج معین کھوکھر اور سیشن جج لاہور کی خصوصی کاوش سے اس سافٹ وئیر کو تیار کیا گیا ہے، سیکرٹری لاہور بار ریحان خان کا کہنا تھا کہ یہ بہت اچھا اقدام ہے، اب بروقت انصاف مل سکے گا۔ایف آئی آر کے آن لائن سافٹ وئیر کے افتتاح کے موقع پر سینئر سول جج لاہور شکیب عمران قمر، ایڈیشنل سیشن جج یونس عزیز، صفدر ایوب اور ریحان خان سمیت سلطان محمود بھی موجود تھے
