کراچی۔ (اے پی پی) آئی جی سندھ ڈاکٹرسید کلیم امام نے پولیس کو ہدایات جاری کیں ہیں کہ شاہ عبدالطیف بھٹائی ؒکے عرس کی تین روزہ تقریبات کے موقع پر تمام تر حفاظتی اقدامات کو انتہائی، ٹھوس اور غیرمعمولی بنایا جائے اوراس سلسلے میں درگاہ سے متصل تجاوزات کو ختم کرنے کیلئے منتظمین اور متعلقہ ادارے سے ہر ممکن تعاون کیا جائے۔ انہوں نے کہا کہ عقیدت مندوں، زائرین اور دیگر شہریوں کی ممکنہ کثیر تعداد میں شرکت کے پیش نظر درگاہ کے اندرونی حصوں، اطراف اور درگاہ کے مرکزی راستوں پر سادہ لباس اور باوردی پولیس اہلکاروں کی تعیناتیوں سمیت پولیس گشت، اسنیپ چیکنگ، پکٹنگ، کڑی نگرانی و ناکہ بندی کے مجموعی اقدامات کو بھی مربوط اور مؤثر بنایا جائے۔ آئی جی سندھ نے کہا کہ درگاہ کے اندرونی و بیرونی احاطوں کے ساتھ اطراف کی ٹیکنیکل سوئپنگ، اسکینگ اورکلیئرنس کے علاوہ گاڑیوں کی پارکنگ کو ناصرف مناسب فاصلوں پر رکھنے بلکہ پارکنگ ایریاز کی کڑی نگرانی کے لئے بھی ہرممکن اقدامات اُٹھائے جائیں۔ انہوں نے کہا کہ عرس کی تقریبات میں شرکت کے لئے جانیوالے قافلوں کوتمام تھانہ جات کی سطح پر مربوط رابطوں کے تحت سیکیورٹی کے ہرممکن اقدامات کی فراہمی کو یقینی بنایا جائے۔ آئی جی سندھ نے مزید کہا کہ تمام مساجد، امام بارگاہ، مزارات، درگاہوں سمیت اقلیتی برادری کے مذہبی مقامات، پبلک مقامات، اہم سرکاری وغیرسرکاری عمارتوں، دفاتر وغیرہ کے لئے سیکیورٹی کے جاری اقدامات کو مذید ٹھوس اور مربوط بنایا جائے۔
شاہ عبداللطیف بھٹائیؒ کا276واں عرس، سیکیورٹی کے غیر معمولی اقدامات
Shares:
