اسلام آباد : بھارتی اداکارہ اور یوینسیف کی خیر سگالی کی سفیر کی پاکستان سے جنگ کی خواہش نے پریانکا کے لیے مشکلات پیدا کردیں، پریانکا کے پاکستان سے جنگ کے بیان کے بعد وفاقی وزیر برائے انسانی حقوق شیریں مزاری نے اقوام متحدہ کے زیلی ادارے یونیسف سے پریانکا چوپڑا کو بطور خیرسگالی سفیر برطرف کرنے کا مطالبہ کیا ہے۔
ذرائع کے مطابق وفاقی وزیر اپنے خط میں لکھتی ہیں کہ یونیسیف نے بھارتی اداکارہ پریانکا چوپڑا کو امن کا سفیر مقرر کیا ہے لیکن انہوں نے بھارتی سرکار کے ظلم اور ہتھکنڈوں کی کھل کر حمایت کی۔شیریں مزاری نے خط میں مزید لکھا ہے کہ بھارتی اداکارہ کا بطور امن کے سفیر رویہ خود امن کے خلاف ہے کیونکہ اداکارہ نے پاکستان پر جوہری حملے کی دھمکی کی بھی کھل کر تائید کی۔
وفاقی وزیر شیریں مزاری کی طرف سے لکھے گئے خط کے مطابق پریانکا کی عالمی قوانین سے روگردانی اقوام متحدہ کی ساکھ کو نقصان پہنچانے کے مترادف ہے لہٰذا امن کی نام نہاد سفیر کی جانب سے جوہری جنگ کی تائید اقوام متحدہ کے منصب کے خلاف ہے۔
یاد رہے کہ بالی وڈ اداکارہ پریانکا چوپڑا رواں برس فروری میں بھارت کے پلوامہ حملے پر جنگ کو بڑھاوا دینے پر تنقید کا شکار بنیں اور اسی وجہ سے چند روز قبل لاس اینجلس میں منعقد ایک بیوٹی ایونٹ میں بھی انہیں پاکستان نژاد امریکی خاتون نے ‘منافق’ کہا تھا۔