شلپا شیٹھی اور ان کی والدہ پر کروڑوں روپے فراڈ کے مقدمات درج

راج کندرہ کیس کے بعد ایک اور اسکینڈل بالی ووڈ اداکارہ شلپا شیٹھی اور ان کی والدہ سنندا شیٹھی کروڑوں روپے کے فراڈ میں ملوث نکل آئی ہیں۔

باغی ٹی وی : بھارتی میڈیا کے مطابق اداکارہ شلپا شیٹھی اور ان کی والدہ سنندا شیٹھی کے خلاف بھارتی ریاست اتر پردیش کے شہر لکھنؤ کے علاقے حضرت گنج اور بھوتی کھنڈ میں دو الگ الگ فراڈ کے مقدمات درج کرائے گئے ہیں۔

قدمات میں مؤقف اختیار کیا گیا ہے کہ شلپا شیٹھی ایک ویلنس سینٹر کی چیئرمین جب کہ ان کی والدہ سنندا شیٹھی اس کی ڈائریکٹر ہیں، دونوں نے ویلنس سینٹر کی برانچ کھولنے کے لیے کروڑوں روپے لیے اور اس میں فراڈ کیا۔

ڈی سی پی (مشرق) سنجیو سمن کا کہنا ہے کہ یہ اہم فراڈ کیس ہے ،شلپا شیٹھی اور سنندا شیٹھی کو مقدمات پر جواب جمع کرانے کے لیے نوٹسز جاری کردیئے گئے ہیں اور بہت جلد پولیس ٹیم ممبئی پہنچ کر دونوں سے اس حوالے سے تفتیش کرے گی۔

دوسری جانب بھارتی میڈیا کے مطابق الی ووڈ اداکارہ شلپا شیٹی اپنے شوہر راج کندرا کی گرفتاری کے بعد سے منظرعام سے غائب ہیں۔ تاہم اب اس واقعے کے بعد پہلی بار وہ متوقع طور پر انسداد کورونا وائرس کے لیے چندہ جمع کرنے کے لیے منعقد ہونے والے ایک ایونٹ میں شریک ہونے جا رہی ہیں۔

ہندوستان ٹائمز کے مطابق شلپا شیٹی اپنے شوہر کی گرفتاری کے بعد سے دانستہ طور پر لوگوں کی نظروں سے دور رہ رہی تھیں اب ان کی اس ایونٹ میں شرکت کی خبر گردش میں ہے جس میں ان کے علاوہ ایڈ شیران اور دیگر لوگ بھی شریک ہوں گے۔

رپورٹ کے مطابق اس ایونٹ میں بالی ووڈ فنکاروں کے علاوہ بین الاقوامی ستارے بھی شریک ہوں گے۔ شلپا اور ایڈ شیران کے علاوہ اس ایونٹ میں ارجن کپور، دیا مرزا، کرن جوہر، پرینیتی چوپڑا، سیف علی خان اور سارا علی خان و دیگر کی شرکت متوقع ہے۔ یہ ایونٹ 15اگست کو منعقد ہو رہا ہے جس سے حاصل ہونے والی رقم آکسیجن، وینٹی لیٹرز اور کورونا وائرس سے متعلق دیگر سازوسامان خریدنے پر خرچ کی جائے گی۔

واضح رہے کہ اداکارہ شلپا شیٹھی اپنے شوہر راج کندرا کے فحش فلموں کے اسکینڈل کے بعد فراڈ کیس کا بھی سامنا کریں گی۔ ممبئی پولیس نے 19 جولائی کو فحش فلمیں بنانے اور انہیں موبائل ایپلیکیشن کے ذریعے نشر کرنے الزام میں راج کندرا کو گرفتار کیا تھا پولیس نے راج کندرا کے دفتر پر چھاپہ مار کارروائی کے دوران 70 سے زائد فحش ویڈیوز اور ویب سرور قبضے میں لیا۔