9 مئی واقعات کےمقدمات سے بریت ، شیخ رشید کی درخواستیں سماعت کیلئے منظور

ہم قانونی دائرے میں رہ کر یہ کیسز لڑیں گے اور جیتیں گے, شیخ رشید
0
100

راولپنڈی: 9 مئی واقعات پر مقدمات سے بریت کے لیے شیخ رشید کی درخواستیں عدالت نے سماعت کے لیے منظور کرلیں۔

شیخ رشید احمد کی سانحہ 9 مئی کے واقعات میں 3 تھانوں کینٹ ،مورگاہ اور ٹیکسلا میں درج مقدمات کے سلسلے میں آج پیشی تھی، تینوں کیسز میں سابق وزیر داخلہ نے عدم شواہد ،ناکافی ثبوت اور اپنی عدم موجودگی کی بنیاد پر بری کرنے کے لیے آئینی درخواستیں دائر کیں-

شیخ رشید کی جانب سے دائر درخواستوں میں مؤقف اختیار کیا گیا ہے کہ سابق وزیر داخلہ اس دن راولپنڈی موجود نہیں تھے انہیں سانحہ 9 مئی کے سلسلے میں جھوٹے مقدمات میں ملوث کیا گیا ہے، انہیں ان مقدمات سے بری کیا جائے،جس پر عدالت نے درخواستیں سماعت کے لیے منظور کرتے ہوئے تفتیشی ٹیموں کو نوٹسز جاری کردئیے اور حکومت کو 14 مئی کو دلائل کے لیے طلب کر لیا ہے۔

بعد ازاں شیخ رشید نے میڈیا سے گفتگو کرتے ہوئے کہا کہ ہمیں جھوٹے مقدمات میں ملوث کیا گیا ہے، یہ سیاسی انتقام ہے۔ حکومت مکمل طور پر ناکام ہوچکی ہے،جو پاکستان میں نہیں تھے، ان کو بھی کیسز میں ملوث کردیا گیا ہےہم قانونی دائرے میں رہ کر یہ کیسز لڑیں گے اور جیتیں گے، جو بے گناہ قید ہیں ان سب کو فوری رہا کر دینا چاہیے۔

Leave a reply