سیالکوٹ(باغی ٹی وی ،بیوروچیف شاہدریاض) وزیر اعلیٰ پنجاب مریم نواز شریف کی ہدایات پر ڈپٹی کمشنر سیالکوٹ محمد ذوالقرنین لنگڑیال کی زیر نگرانی ریسٹ ہاؤس پٹواریاں کے ہال میں ریونیو عوامی خدمت سروسز کورٹ کا انعقاد کیا گیا۔ اجلاس میں اسسٹنٹ کمشنر انعم بابر، تحصیلدار، نائب تحصیلدار اور دیگر ریونیو افسران شریک ہوئے۔
ڈپٹی کمشنر نے محکمہ مال کے حکام کو ہدایت دی کہ ہر ماہ کے پہلے دو ورکنگ ڈیز میں چاروں تحصیل ہیڈکوارٹرز پر ریونیو عوامی خدمت کورٹ کا انعقاد کیا جائے، تاکہ شہریوں کی شکایات کا فوری حل ممکن بنایا جا سکے۔ انہوں نے واضح کیا کہ شکایات کی رجسٹریشن کے بعد ان کے حل کے اقدامات سینیئر ممبر بورڈ آف ریونیو کو رپورٹ کیے جائیں گے۔
اجلاس کے دوران ڈپٹی کمشنر نے سائلین کے مسائل سنے اور فوری حل کے احکامات صادر کیے۔ عوامی ریونیو کورٹ کے انعقاد کا مقصد محکمہ مال سے متعلق مسائل کا فوری اور شفاف حل فراہم کرنا ہے۔
