سیالکوٹ، باغی ٹی وی(بیوروچیف شاہدریاض)سرجیکل مینوفیکچرنگ ایسوسی ایشن پاکستان کے گروپ لیڈر اتحاد فائونڈرز، ریاض الدین شیخ کا کہنا ہے کہ سیالکوٹ کے صنعتکار دنیا بھر میں "میڈ ان پاکستان” کی معیاری مصنوعات ایکسپورٹ کرنے میں منفرد مقام رکھتے ہیں۔
ایوان صنعت و تجارت سیالکوٹ کے شفیع میموریل ہال میں سرجیکل انسٹرومنٹس ایسوسی ایشن پاکستان کی ایک اہم میٹنگ ہوئی جس میں اس بات پر زور دیا گیا کہ پاکستان کی سرجیکل انسٹرومنٹس دنیا بھر میں بہت مشہور ہیں۔ ایسوسی ایشن کے مطابق، پاکستان میں تیار کی جانے والی سرجیکل آلات کی کوالٹی اور منفرد ڈیزائن کا کوئی مقابلہ نہیں کر سکتا۔ اس کی وجہ یہ ہے کہ سیالکوٹ میں بہت ہی مہارت رکھنے والے کاریگر اور کارخانہ دار موجود ہیں۔
صدر ایوان صنعت و تجارت سیالکوٹ، عبدالغفور ملک نے بھی اس بات کی تصدیق کی کہ پاکستان کی سرجیکل انسٹرومنٹس کی دنیا بھر میں مانگ ہے۔ انہوں نے کہا کہ سیالکوٹ سے تقریباً ہر شعبے میں برآمدات ہوتی ہیں اور ہماری معیاری مصنوعات ہمیں دنیا کی منڈیوں میں ممتاز کرتی ہیں۔
ریاض الدین شیخ نے کہا کہ سیالکوٹ چیمبر آف کامرس اینڈ انڈسٹری کے صنعتکاروں کو فخر ہے کہ وہ دنیا بھر میں پاکستان کی شہرت کو بڑھا رہے ہیں۔ انہوں نے کہا کہ سیالکوٹ بزنس کمیونٹی کی محنت اور لگن کی بدولت ہی پاکستان کی مصنوعات دنیا بھر میں مقبول ہو رہی ہیں۔
