حجاج کرام رب رحمان کے مہمان ہیں، سعودی حکومت ہر سال رب رحمان کے لاکھوں مہمانوں کےلئے شاندار ، پرامن اور بہترین حج انتظامات کرتی ہے جس پر ہم خادم الحرمین ملک سلمان بن عبدالعزیز ، ولیعہد محمد بن سلمان، وزیر حج ڈاکٹر توفیق بن فوزان اور حرمین الشریفین انتظامیہ کے سربراہ الشیخ عبدالرحمن السدیس کو مبارک باد پیش کرتے ہیں ۔حجاج کرام سیاسی نعرہ بازیوں سے گریز کریں اور اپنی توجہ سنت طریقہ کے مطابق مناسک حج بجالانے پر رکھیں ۔
ان خیالات کا اظہار پاکستان اسلامک کونسل کے چئیرمین اور جامعہ سعدیہ سلفیہ کے پرنسپل ڈاکٹر حافظ مسعود اظہر نے کیا ۔ انھوں نے کہا کہ ہرسال پوری دنیا سے مختلف رنگ ونسل اور ممالک سے تعلق رکھنے والے لاکھوں حجاج کرام سرزمین حرمین میں مناسک حج بجالانے کےلئے جمع ہوتے ہیں ۔ سعودی حکومت حجاج کرام کےلئے ہر سال بہترین انتظامات کرتی ہے ۔ زائرین کو مناسک حج بجالانے میں کبھی کوئی مشکل پیش نہیں آتی ہے جو کہ سعودی حکومت کی حجاج کرام کے ساتھ محبت ، عقیدت اور خدمت کی واضح دلیل ہے ۔ انھوں نے کہا کہ حجاج کرام رب رحمان کے مہمان ہیں اور سعودی حکومت اپنے قیام سے ہی اس بات کےلئے کوشاں رہی ہے کہ ضیوف الرحمن کےلئے بہترین انتظامات کئے جائیں ۔ حج کے موقع پر سارے عالم اسلام کی نمائندگی ہوتی ہے جس کی وجہ سے یہ عظیم اجتماع امت کی وحدت کا ذریعہ سمجھا جاتا ہے ۔سعودی حکومت نے حج کی عبادات بجالانے ، مقدس مقامات کے درمیان آمد ورفت اور حجاج کرام کے علاج معالجہ کےلئے ہر سال مثالی اور نہایت ہی عمدہ انتظامات کرتی ہے ۔ مکہ مکرمہ، مدینہ منورہ، منی، مزدلفہ اور عرفات میں ہیلتھ سینٹرز اور ہسپتالوں کے جال بچھا دیے گئے ہیں۔ سینکڑوں ایمبولینسیں زائرین کی خدمت کےلئے مامور کر دی گئی ہیں ۔ ہنگامی بنیادوں پردرجنوں ہسپتال اور ہیلتھ سینٹرز قائم کردیے گئے ہیں۔ مشاعر مقدسہ ٹرین اور حرمین ایکسپریس ٹرین میں بھی میڈیکل پوائنٹس بنا دیے گئے ہیں ۔ان سب سہولیات کا مقصد یہ ہے کہ حجاج کرام احسن طریقے سے مناسک حج بجالاسکیں لہذا حجاج کرام کو چاہئے کہ وہ سعودی حکومت کے عملہ کے ساتھ تعاون کریں اور اپنی توجہ صرف اور صرف حج کی عبادات پر رکھیں ۔
