سندھ ہائیکورٹ نے گجر نالے تجاوزات آپریشن سے متعلق لیز مکانات توڑنے کیخلاف درخواست پر چیف سیکریٹری ودیگر کو نوٹس جاری

سندھ ہائیکورٹ نے گجر نالے تجاوزات آپریشن سے متعلق لیز مکانات توڑنے کیخلاف درخواست پر چیف سیکریٹری، سیکریٹری بلدیات کو نوٹسز جاری کردیئے۔ جسٹس محمد شفیع صدیقی اور جسٹس آغا فیصل پر مشتمل ڈویژنل بینچ کے روبرو گجر نالے تجاوزات آپریشن میں لیز مکانات توڑنے کیخلاف درخواست کی سماعت ہوئی۔
درخواستگزاروں کے وکیل نے موقف دیا کہ اینٹی انکروچمنٹ ٹربیونل نے گھر گرانے کا حکم نہیں دیا۔ گجرنالہ تجاوزات سے متعلق فیصلے کا غلط استعمال ہو رہا ہے۔ لیز مکانات کو توڑا جا رہا ہے۔ متعلقہ حکام کو لیز مکانات توڑنے سے روکا جائے۔ چیف سیکریٹری اور دیگر متعلقہ حکام کیخلاف توہین عدالت کی کارروائی کی جائے۔ عدالت نے چیف سیکریٹری، سیکریٹری بلدیات کو نوٹسز جاری کرتے ہوئے جواب طلب کرلیا۔