کراچی:چند گھنٹوں میں معروف ٹک ٹاکر مسکان سمیت 6 افراد قتل کردیئے گئے،ہرطرف خوف وہراس،اطلاعات کے مطابق کراچی میں 24 گھنٹوں کے دوران فائرنگ کے دو واقعات میں 6افراد کو قتل کردیا گیا، قتل ہونے والوں میں دو خواتین بھی شامل ہیں جن میں سے ایک معروف ٹک ٹاکر مسکان بھی ہے۔
رات گئے ایک واقعہ کراچی کے علاقے بوٹ بیسن میں پیش آیا جبکہ دوسرا گارڈن کے علاقے میں پیش آیا۔پولیس کا کہنا ہے کہ کراچی میں گزشتہ شب اور آج علی الصبح پیش آنے والے فائرنگ کے دونوں واقعات میں قتل کے محرکات غیرت کے نام پر قتل اور دشمنی ہوسکتی ہے۔
پولیس حکام کا کہنا ہے کہ بوٹ بیسن میں تعاقب کے بعد فائرنگ کر کے پہلے عینی کو قتل کیاگیا، عینی شادی شدہ تھی تاہم شوہر کے ساتھ نہیں بلکہ اپنے والدین کے گھر پر رہتی تھی، عینی کو اس کے پڑوسی اور دوست عدنان کے ساتھ تعاقب کے بعد قتل کیا گیا۔
عینی کو جسم کے اوپری حصے میں 3 گولیاں ماری گئیں، پھر عدنان کو قتل کیا گیا، قتل میں تیس بور پستول استعمال کیا گیا اور موقع سے پانچ خول ملے۔
تحقیقاتی حکام کے مطابق گارڈن میں پیش آنے والے فائرنگ کے واقعے میں بھی گھات لگاکر ٹک ٹاکر مسکان کو 3 دوستوں سمیت قتل کیا گیا، گارڈن میں بھی ملزمان نے مسکان سمیت چاروں افراد کا تعاقب کیا اور پھر قتل کیا۔
