لاہور: استحکام پاکستان پارٹی سے سیاسی شخصیات کی وابستگی کاسلسلہ جاری ہے-
باغی ٹی وی:ڈسٹرکٹ اٹک کی معروف سیاسی شخصیت اور ایک سے زائد بار صوبائی وزیر رہنے والے کرنل (ر) محمد انور اور چکوال سے سابق ممبر قومی اسمبلی سردار ذوالفقار علی خان نے صدر استحکام پاکستان پارٹی عبدالعلیم خان سے ملاقات کر کے آئی پی پی میں باضابطہ شمولیت کا اعلان کر دیا ہے۔
انہوں نے جہانگیر خان ترین اور عبدالعلیم خان کی قیادت پر بھرپور اعتماداور تشکر کا اظہار کرتے ہوئے اپنے ساتھیوں سمیت غیر مشروط طورپر استحکام پاکستان پارٹی میں شامل ہونے اور آئندہ سیاسی سرگرمیاں جاری رکھنے کے عزم کا اعادہ کیا ہے، اس موقع پر گفتگو کرتے ہوئے صدر آئی پی پی عبدالعلیم خان کا کہنا تھا کہ آج ملک کو جن مسائل کا سامنا ہے اُس کا تقاضا ہے کہ مزید وقت ضائع کیے بغیر ملکی استحکام کیلئے کام کیا جائے اور اس مقصد کیلئے ہم سب کو مل کر چلنا ہوگا۔
انہوں نے کہا کہ استحکام پاکستان پارٹی کا منشور ہر شہری کے دل کی آواز ہے، ہم صرف دعویٰ نہیں کرتابلکہ اپنے وعدے وفا بھی کریں گےعبدالعلیم خان نے کہا کہ بد قسمتی سے غریب آدمی کو75برسوں میں صرف وعدوں پر ٹرخایا گیا ہے لیکن اب عمل کرنے کا وقت آ گیا ہے،اس میں کوئی شک نہیں کہ بجلی،پٹرول اور اشیائے خوردونوش کے آسمان سے باتیں کر تے ہوئے نرخ عام آدمی کے بنیادی مسائل ہیں جنہیں حل کرنے کیلئے ہم میدان عمل میں اترے ہیں اور ان شاء اللہ نیک نیتی سے آگے بڑھتے ہوئے کم سے کم وقت میں زیادہ سے زیادہ نتائج دیں گے۔
صدر استحکام پاکستان پارٹی عبدالعلیم خان نے کرنل (ر) محمد انور اور سردار ذوالفقار علی خان کی اپنے اپنے اضلاع میں سیاسی خدمات کو سراہتے ہوئے اُن کی پارٹی میں شمولیت کا خیر مقدم کیا اور انہیں اپنے مکمل تعاون کی یقین دہانی کروائی۔اپنی گفتگو میں سابق ایم این اے سردار ذوالفقار علی خان اور سابق صوبائی وزیر کرنل (ر) محمد انور نے کہا کہ وہ استحکام پاکستان پارٹی کواپنے اضلاع میں منظم کریں گے اور پارٹی قیادت کے دست و بازی بنیں گے۔ سابق وفاقی وزیر غلام سرور خان بھی اس موقع پر موجود تھے۔