پیپلز پارٹی کے چیئرمین بلاول زرداری نے کہا ہے کہ کسی بھی صورت صوبے کے خلاف سازش برداشت نہیں کریں گے ،آپ کراچی پرقبضے کی بات کرکے کیا ثابت کرنا چاہتے ہیں؟
باغی ٹی وی کی رپورٹ کے مطابق بلاول زرداری نے حیدر آباد پریس کلب میں صحافیوں سے گفتگو کرتے ہوئے کہ ملک بہت مشکل وقت سے گزر رہا ہے، کٹھ پتلی حکمرانوں نے صحافت پر بھی حملے کیے ،پیپلز پارٹی اداروں کی آزادی پر یقین رکھتی ہے ،پاکستان کو آج جمہوریت سے آمریت کی طرف دھکیلا جارہا ہے ،
بلاول زرداری کا مزید کہنا تھا کہ کراچی کو سندھ سے علحیدہ کرنے کی سوچ ایک خطرناک سازش ہے ،این ایف سے کے باوجود صوبوں کو وسائل نہیں دیئے گئے ،ملک کی معیشت کو کمزور کیاگیا ،عوام پر مہنگائی کا بوجھ ڈالا گیا، اٹھارہویں ترمیم پر حملے ہو رہے ہیں، عمران خان نے سندھ میں کھڑے ہو کر کہا کہ اٹھارہویں ترمیم کی وجہ سے وفاق کے پاس کچھ نہیں بچا،ہم نے18ویں ترمیم کی صورت میں آئین کو بحال کیا،بے نظیر بھٹو کی سیاسی جدوجہد سب کے سامنے ہے
بلاول زرداری کا مزید کہنا تھا کہ حکومت کے پاس غریب کے پاس خرچ کرنے کو کچھ نہیں، بھٹو نے غریب کے لئے آواز اٹھائی تھی،پاکستان میں معاشی انصاف لانا ہے تو وفاق کو صوبوں کو وسائل دینے پڑیں گے، حیران کن بات ہے کہ کل وفاقی وزیر قانون نے اعلان کیا کہ وہ کراچی پر قبضہ کرنا چاہتے ہیں ،یہ کیا مذاق ہے، وسائل بھی چھینو، حقوق بھی چھینو، ہمارا آواز دباؤ، عوام کا معاشی قتل کرو،بچوں کو تحفظ نہیں مل رہا اور وفاق کراچی پر قبضہ کرنا چاہتا ہے ،کسی بھی صورت صوبے کےخلاف سازش برداشت نہیں کریں گے .
