اسلام آباد (اے پی پی) ملک بھر میں کھیلوں کے نظام کو بہتر بنانے کیلئے تعلیمی اداروں کو کردار ادا کرنے کی تجویز سامنے آئی ہے.
تفصیلات کے مطابق رکن تحصیل کونسل سوات فٹ بال کلب کے جنرل سیکرٹری حاجی نواب خان نے کہا ہے کہ ملک بھر میں کھیلوں کے نظام کو بہتر بنانے کےلئے تعلیمی ادارے اپنا کردار ادا کرسکتے ہیں اور حکومت کھلاڑیوں کو سہولیات فراہم کرنے کےلئے ٹھوس منصوبہ بندی کرے۔ انہوں نے کہا کہ ایک ایسا دور تھا جب پاکستان نے کھیلوں کے میدان میں حکمرانی کی جن میں ہاکی ، کرکٹ، سکواش اور سنوکر کے کھیل شامل تھے آہستہ آہستہ یہ اعزازت ہمارے ہاتھ سے نکل گئے اس کی سب سے بڑی وجہ یہ تھی کہ کھیلوں میں سیاست آنی شروع ہوگئی اور عہدیدار ملکی مفاد کو چھوڑ کر اپنی اپنی کرسیاں بچانے کے چکر میں پڑ گئے اور سفارش اور پرچی سسٹم پروان چڑھتا گیا اور کھلاڑیوں کا چناﺅ میرٹ کی بنیاد پر ہونا بند ہوگیا اور کھلاڑیوں کو ملازمیتں بھی نہیں مل رہیں جس کی وجہ سے کھلاڑیوں نے بھی کھیل میں دلچسپی لینی بند کر دی۔ انہوں نے کہا کہ گراس روٹ سطح پر کھیلوں کی ترقی کےلئے کسی زمانے میں تعلیمی اداروں کا بہت اہم کردار ہوتا تھا وہ بھی نہ ہونے کے برابر ہے۔
انہوں نے مزید کہا کہ وزیراعظم عمران خان خود بھی ایک کھلاڑی رہ چکے ہیں ان کو کھیلوں میں دلچسپی لینی چاہئے اور حکومت تعلیمی اداروں میں کھیلوں کے انعقاد کو یقینی بنائے تاکہ ملک میں کھیلوں کو فروغ حاصل ہو۔
