سلیمان شہباز کی منی لانڈرنگ ریفرنس میں عبوری ضمانت منظور

احتساب عدالت لاہور نے سلیمان شہباز کی منی لانڈرنگ ریفرنس میں عبوری ضمانت 7 جنوری تک منظور کرلی

احتساب عدالت لاہور نے سلیمان شہباز کی عبوری ضمانت 5لاکھ روپے کے مچلکوں کے عوض منظور کی احتساب عدالت لاہور نے سلیمان شہباز کو شامل تفتیش ہونے کا حکم دے دیا ،جج نے وکیل کوہدایت کی کہ سلیمان شہباز کا شناختی کارڈ عدالت میں پیش کیا جائے، سلیمان شہباز نے جواب دیا کہ میرے پاس شناختی کارڈ ابھی موجود نہیں ہے ،جج نے سلیمان شہباز سے مکالمہ کرتے ہوئے کہا کہ شناختی کارڈ کی آج ضرورت تھی یہ تو ہر وقت ساتھ ہونا چاہیے شناختی کارڈ ہی ہماری اصل شناخت ہے،

واضح رہے کہ احتساب عدالت لاہور میں سلیمان شہباز نے منی لانڈرنگ ریفرنس میں عبوری ضمانت کی درخواست دائر کی تھی،سلیمان شہباز نے وکیل امجد پرویز کی وساطت سے ضمانت احتساب عدالت لاہور میں دائر کی تھی منی لانڈرنگ کیس میں نامزد سلیمان شہباز درخواست ضمانت دائر کرنے کے لیے اسپیشل کورٹ سینٹرل پہنچے جہاں انہوں نے عبوری ضمانت کی درخواست دائر کرتے ہوئے ایف آئی اے اور تفتیشی افسر کو فریق بنایا ،عدالت میں دائر درخواست میں کہا گیا کہ ایف آئی اے نے منی لانڈرنگ کیس میں بلاجواز نامزد کیا عدالت میں طلبی کے نوٹس موصول نہیں ہوئے اور بغیر اطلاع اشتہاری قرار دیا گیا اشتہاری قرار دینے سے قبل قانونی تقاضے پورے نہیں کیے گئے، منی لانڈرنگ مقدمے میں شامل تفتیش ہونے کے لیے عبوری ضمانت منظور کی جائے

سلیمان شہباز رواں ماہ ہی لندن سے پاکستان پہنچے تھے اور انہوں نے اپنے خلاف دائر منی لانڈرنگ کے مقدمات کا سامنا کرنے کا اعلان کیا تھا،پاکستان پہنچنے سے قبل عدالت نے سلیمان شہباز کی ضمانت منظور کی تھی،