لاہور:شوریٰ ممبران کی وجہ سے قوم مصیبت میں ہے،اپنےآپ کوقانون کےحوالے کردیں: دھرنا فی الفورختم کیا جائے،سعد رضوی نے پھراپیل کردی،اطلاعات کے مطابق کالعدم تحریک لبیک پاکستان (ٹی ایل پی) کے سربراہ سعد حسین رضوی نے اپنی جماعت کی شوریٰ کے ارکان کے نام پیغام دیا ہے۔
سعد رضوی نے ناراضگی کا اظہارکرتے ہوئے کہا ہےکہ وہ کیوں ضد کرکے ملک وقوم کو مصیبت میں ڈال رہے ہیں ، اب بس کردیں ان کی وجہ سے اتنا بڑا نقصان ہوگیا ہے
سادہ کاغذ پر ہاتھ سے تحریر پیغام پر 17 اپریل کی تاریخ درج ہے جس میں کہا گیا ہے کہ مسجدِ رحمت اللعالمین کے باہردھرنا فی الفورختم کیا جائے اور کارکنان پرامن طور پرگھروں کو واپس لوٹ جائیں۔
ان کا کہنا ہے کہ شوریٰ ممبران کی ضد کی وجہ سے سیکڑوں کارکن اورعوام 6 دن سے خوار ہورہے ہیں۔سعد رضوی نے اپیل کرتے ہوئے درخواست کی کہ ظہیرالحسن شاہ میری ہدایات پر فوری عمل کروائیں۔
خیال رہے کہ لاہور میں پولیس اور رینجرز نے یتیم خانہ چوک پرکئی روز سے قابض مظاہرین کو منتشر کرنے کیلئے آپریشن کیا ہے۔
آپریشن کے دوران یتیم خانہ چوک کی جانب جانے والے تمام راستے بند کردیے گئے جبکہ قانون نافذ کرنے والے اداروں اور مظاہرین کے درمیان جھڑپوں کی اطلاعات ہیں۔
