ٹھٹھہ: امن و امان کے لیے پولیس کی سنیپ چیکنگ جاری
ٹھٹھہ (باغی ٹی وی ،نامہ نگار بلاول سموں)آئی جی سندھ غلام نبی میمن اور ڈی آئی جی حیدرآباد رینج طارق رزاق دھاریجو کی ہدایات پر ایس ایس پی ٹھٹہ ڈاکٹر محمد عمران خان کے احکامات کے تحت ضلع بھر میں امن و امان کی بحالی کے لیے پولیس کی سنیپ چیکنگ کا سلسلہ جاری ہے۔
سنیپ چیکنگ کے دوران موٹر سائیکلوں، رکشوں، مسافر وینز، بسوں اور دیگر چھوٹی بڑی گاڑیوں کو روکا گیا۔ کئی گاڑیوں سے ٹنٹڈ شیشے اور فینسی نمبر پلیٹس بھی ہٹائے گئے۔ پولیس حکام کے مطابق، تمام ایس ڈی پی اوز اپنے اپنے علاقوں میں ایس ایچ اوز کے ساتھ مل کر سنیپ چیکنگ میں حصہ لے رہے ہیں۔
شہر کے داخلی اور خارجی راستوں پر بھی چیکنگ کا عمل جاری ہے، جہاں پولیس نے متعدد مشکوک افراد اور بغیر نمبر پلیٹ والی موٹر سائیکلوں کو تحویل میں لے کر ان کی تصدیق کا عمل شروع کر دیا ہے۔
پولیس کا کہنا ہے کہ اس چیکنگ کا مقصد ضلع میں امن و امان کو یقینی بنانا اور کسی بھی ناخوشگوار واقعے کو پیش آنے سے روکنا ہے۔ عوام سے بھی تعاون کی اپیل کی گئی ہے تاکہ امن عامہ کو برقرار رکھا جا سکے۔
