وزیر اعلی پنجاب سراد عثمان بزدار کی ہدایت پر خانیوال میں دو روزہ جشن بہاراں ثقافتی میلے کا آغاز ہوگیا ۔صوبائی وزیر زراعت پنجاب سید حسین جہانیاں گردیزی، ڈپٹی کمشنر آغا ظہیر عباس شیرازی نے فضاء میں غبارے چھوڑ کر رنگارنگ پروگرامز کا افتتاح کیا-
ایم پی اے فیصل اکرم خان نیازی ، ایڈیشنل ڈپٹی کمشنر جنرل محمد اختر منڈھیرا ،ایڈیشنل ڈپٹی کمشنر ریونیو محمد اکرام ملک ،ضلعی صدر پی ٹی آئی مہر عمران پرویز دھول ،صدر ڈسٹرکٹ بار، بار راؤ خالد محمود ، جنرل سیکرٹری سید حامد علی شاہ ،ممبران امن کمیٹی ،پی ٹی آئی عہدیداران ،سول سوسائٹی اور شہریوں کی بہت بڑی تعداد نے شرکت کی ۔افتتاحی تقریب میں صوبائی وزیر اور ڈپٹی کمشنر و دیگر مہمانوں کو بگھی میں بٹھا کر پنڈال میں لایا گیا جنہوں نے سرائیکی کلچر ڈے کے حوالہ سے سرائیکی اجرک اور پگڑی پہن رکھی تھی ۔
صوبائی وزیر اور ڈپٹی کمشنر نے سرکاری و نجی اداروں کی طرف سے لگائے گئے پھولوں ،کھانے پینے کی اشیاء ،دستکاری ،پالتو جانوروں کے نمائشی سٹالز اور جھولوں کا بھی معائنہ کیا اس موقع پر سکولوں کے طلباء کی طرف سے پی ٹی شو جبکہ ریسکیو 22 11 اور سول ڈیفنس کی طرف سے ہنگامی حالات سے نمٹنے کے لیے موک ایکسرسائز کی گئی محکمہ لائیو سٹاک نے نایاب نسل کی گائے ،بھینسوں ،بکریوں ،بھیڑوں، اونٹوں کی پریڈ کرائی گئی جس کو شرکاء نے خوب سراہا اس موقع پر میجک شو ،گھوڑا ڈانس اور جھومر پارٹی کی جانب سے رقص بھی پیش کیا گیا ۔صوبائی وزیر زراعت پنجاب سید حسین جہانیاں گردیزی نے خطاب کرتے ہوئے کہا کہ وزیر اعلی پنجاب سردار عثمان بزدار کی ہدایت پر صوبہ بھر میں ثقافتی تقریبات منعقد کی جا رہی ہیں جن کا مقصد دنیا بھر میں پاکستان کی مصنوعات ،جانوروں ،ملبوسات ،پھولوں اور رنگوں کو دنیا بھر میں متعارف کرانا ہے انہوں نے کہا کہ شہری جشن بہاراں کی تقریبات میں بڑھ چڑھ کر حصہ لیں اور کورونا وائرس سے بچاؤ کی ایس او پیز پر عمل کریں ۔
ڈپٹی کمشنر آغا ظہیر عباس شیرازی نے خطاب کرتے ہوئے کہا کہ جشن بہاراں پر اہلیان ضلع کے ذوق کو مدنظر رکھتے ہوئے پروگرامز ترتیب دیے گئے ہیں جس کے لیے تمام محکمہ جات کی کاوشیں قابل ستائش ہیں افتتاحی تقریب کے اختتام پر صوبائی وزیر اور ڈپٹی کمشنر نے کلین اینڈ گرین پنجاب کے سلسلہ میں پودے بھی لگائے ۔دریں اثناء جشن بہاراں کے سلسلہ میں گورنمنٹ پوسٹ گریجوایٹ گرلز کالج میں بھی طالبات کے درمیان رسہ کشی اور میوزیکل چئیر کے مقابلے ہوئے- ایم پی اے شاہدہ احمد حیات مہمان خصوصی تھیں۔