پی آئی اے کا مسافر طیارہ بڑے حادثے سے بال بال بچ گیا

کراچی:قومی ایئرلائن پی آئی اے کا مسافر طیارہ گزشتہ روز بڑے حادثے سے بال بال بچ گیا، طیارے میں100 سے زائد مسافر سوار تھے، کراچی سے لاہور جانے والی پرواز پی کے306 جب 4 ہزار فٹ بلندی پر پہنچی تو پائلٹ کو پتا چلا کہ اسپیڈ میٹرز خراب ہیں، پائلٹ نے فوری ایئرٹریفک کنٹرولر سے رابطہ کیا اور طیارے کو بحفاظت واپس کراچی ائیرپورٹ لینڈ کرایا۔

تفصیلات کے مطابق قومی ایئرلائن پی آئی اے کا مسافر طیارہ گزشتہ شب 100 سے زائد مسافروں کے ساتھ کراچی سے لاہور جانے کیلئے 4 ہزار فٹ بلندی پر پہنچا توپتا چلا کہ اسپیڈ میٹرز خراب ہیں، جس پر پائلٹ رضوان گوندل نے فوری ایئرٹریفک کنٹرولر سے رابطہ کیا اور پی کے306 کو بحفاظت کراچی ائیرپورٹ اتار لیا۔

ذرائع کا بتانا ہے کہ طیارے میں خرابی طویل عرصے تک کھڑا رہنے اور مناسب دیکھ بھال نہ ہونے کی وجہ سے پیدا ہوئی۔ پائلٹس اس طرح کی خرابی کی نشاندہی پہلے بھی کرچکے ہیں۔

مذکورہ طیارہ ہزاروں کی فٹ کی بلندی پر تھا جب پائلٹ رضوان گوندل پر انکشاف ہوا کہ دونوں اسپیڈ میٹرز طیارے کی رفتار مختلف بتا رہے ہیں۔ بائیں طرف کا میٹر ٹارگٹ اسپیڈ 200 ناٹیکل میل بتا رہا تھا جبکہ اصل ٹارگٹ اسپیڈ 250 ناٹیکل میل تھی۔

کیپٹن رضوان کو اندازہ ہوگیا کہ سفر جاری رکھا تو طیارہ کسی حادثے سے دوچار ہوسکتا ہے، اس لیے انہوں نے فوری طور پر ایئر ٹریفک کنٹرول سے رابطہ کیا۔

اس حوالے سے ترجمان پی آئی اے کا کہنا ہے کہ مسافروں کو دوسری پرواز کے ذریعے رات ساڑھے دس بجے لاہور روانہ کیا گیا جبکہ فنی خرابی کی تحقیقات کا حکم دے دیا گیا ہے۔