تہران : تیونسی صدر کی وفات کا ایران کو بہت غم ، تیونسی حکومت نے صدر کے انتقال پر ایک ہفتے کا سوگ منانے کا اعلان کردیا ،دوسری طرف تیونس کے صدر کے انتقال کے بعد محمد الناصر تیونس کے عبوری صدر منتخب ہو گئے ہیں۔
تیونسی صدر کی وفات پرایران کے وزیر خارجہ محمد جواد ظریف نے اپنے پیغام میں تیونس کے وزیر خارجہ خمیس الجهیناوی کو مخاطب کرتے ہوئے تیونس کے صدر باجی قائد السبسی کے انتقال پر دکھ اورغم کا اظہار پیش کرتے ہوئے ان کے اہلخانہ، حکومت اور عوام سے ہمدردی کا اظہار کیا اور کہا کہ ایران کی حکومت اورعوام مصیبت کی اس گھڑی میں تیونس کی حکومت اور عوام کے ساتھ ہے۔
دوسری طرف تیونس کی پارلیمنٹ کے اسپیکر محمد الناصر نے تیونس کے صدر باجی قائد السبسی کے انتقال کے بعد تیونس کے عبوری صدر کی حیثیت سے حلف اٹھا لیا ہے۔تیونس کے بنیادی آئین کے مطابق صدر کے انتقال کے بعد پارلیمنٹ کے اسپیکر عبوری صدر کی حیثیت سے ملک کا نظام سنبھالتے ہیں۔
تیونس کے صدر کو حال ہی میں صحت خراب ہونے کی و جہ سے اسپتال میں داخل کیا گیا تھا جہاں ان کا 92 برس کی عمر میں انتقال ہوگیا۔
