لیبیانے ترکی کا ڈرون طیارہ مار گرایا

لیبیا نے دارالحکومت طرابلس کے نواحی علاقے العزیزیہ میں ترکی کا ایک ڈرون طیارہ مار گرایا۔

تفصیلات کے مطابق لیبیا کی فوج کی جنرل کمان کے زیر انتظام میڈیا سینٹر نے ایک بیان میں واضح کیا کہ جاسوسی اور تصویر کشی کے لیے مخصوص یہ ڈرون طیارہ اس وقت گرایا گیا جب وہ طرابلس کے جنوب میں واقع علاقے العزیزیہ کی جانب جا رہا تھا۔

دارالحکومت طرابلس کو مسلح ملیشیاؤں اور دہشت گرد تنظیموں سے آزاد کرانے کے لیے فوجی آپریشن کا آغاز رواں سال 4 اپریل کو ہوا تھا۔ اس کے بعد سے اب تک لیبیا کی فوج ترکی کے 10 کے قریب ڈرون طیارے مار گرانے میں کامیاب ہو چکی ہے۔ یہ طیارے وفاق کی حکومت کی فورسز کی پیش قدمی کے واسطے کوریج فراہم کرنے کے واسطے استعمال ہوئے۔ لیبیا کی فوج معیتیقہ کے بین الاقوامی ہوائی اڈے پر ڈرون طیاروں کے کنٹرول روم کو بھی تباہ کر چکی ہے۔
واضح رہے کہ ترکی پر الزام ہے کہ وہ لیبیا میں وفاق کے خلاف لڑنے والوں کو اسلحہ فراہم کر رہا ہے اور اس سلسلے میں‌ مظاہرین نے ترکی سے مطالبہ کیا کہ وہ وفاق کی حکومت کو اسلحے کی فراہمی روک دے جو طرابلس پر مسلح ملیشیاؤں کے کنٹرول کو سپورٹ کر رہی ہے۔

مظاہرین نے لیبیا کی قومی فوج کی حمایت میں بینرز اٹھا رکھے تھے جن میں باور کرایا گیا تھا کہ وہ طرابلس میں مسلح ملیشیاؤں کے خلاف معرکے میں فوج کے سربراہ خلیفہ حفتر کے ساتھ کھڑے ہیں۔