ترک صدرطیب اردوان کا یوکرینی ہم منصب سےٹیلی فونک رابطہ:ارطغرل غازی بھی میدان میں آگئے

انقرہ :ترک صدرطیب اردوان کا یوکرینی ہم منصب سے ٹیلی فونک رابطہ:ارطغرل غازی بھی میدان میں آگئے،اطلاعات کے مطابق ترک صدر رجب طیب اردگان نے یوکرینی ہم منصب ولادیمیر زیلنسکی سے ٹیلی فونک رابطہ کیا ہے۔

ذرائع کے مطابق یوکرائنی صدر سے گفتگو کرتے ہوئے ترک صدر نے یقین دہانی کروائی ہے کہ ترکی روس اور یوکرین کےدرمیان فوری جنگ بندی کی کوششیں کررہا ہے۔دو روز قبل روسی افواج کے یوکرین پر حملے کے فوراً بعد انقرہ میں یوکرین کے سفارت خانے نے ترکی سے مدد کی اپیل کی تھی۔

یوکرینی سفارت خانے نے ٹوئیٹر پر جاری پیغام میں کہا تھا کہ روس نے یوکرین کے خلاف جنگ شروع کر رکھی ہے اور پرامن شہروں پر بمباری کی جا رہی ہے۔سفارت خانے کی جانب سے مزید کہا گیا کہ ہم اپنے اسٹریٹجک پارٹنر ترکی اور اس کی عوام سے اس مشکل وقت میں ہمارا ساتھ دینے کا مطالبہ کرتے ہیں۔

بعد ازاں ترک صدر نے اپنے یوکرینی ہم منصب ولادیمیر زیلنسکی سے ٹیلیفونک رابطہ کیا اور یوکرین پر روس کے حملے کی مذمت کرتے ہوئے اسے علاقائی امن اور استحکام کے لیے ایک بھاری دھچکا قرار دیا۔واضح رہے کہ جنگ کے دوران اب تک سینکڑوں شہری ہلاک ہوچکے ہیں۔

دوسری جانب یوکرینی فوج نے دعویٰ کیا ہے کہ اب تک ساڑھے 3 ہزار سے زائد روسی فوجی ہلاک اور 200 کے قریب قیدی بنائے جا چکے ہیں۔

دوسری طرف معروف اداکار انگین التان نے یوکرین کی موجودہ صورتحال کو مدِ نظر رکھتے ہوئے امن کا پیغام جاری کر دیا ہے۔ترک کی مشہور سیریز ارتغرل غازی کا مرکزی کردار ادا کرنے والے انگین التان بھی اس حوالے سے میدان میں آئے ہیں اور امن کا پیغام جاری کیا ہے۔

انسٹا گرام پر ترک اداکار انگین التان دوزیتان نے اپنی اسٹوری پر لکھا کہ ”جنگ نہیں امن، تباہی نہیں تخلیقی صلاحیت، نفرت نہیں ہمدردی، لالچ نہیں سخاوت، صرف ہمارے لیے نہیں بلکہ دنیا میں سب کے لیے“۔