متحدہ عرب امارات کا پہلا جوہری بجلی پلانٹ مکمل

ابوظہبی: متحدہ عرب امارات (یو اے ای) نے عرب دنیا کا پہلا جوہری بجلی پلانٹ مکمل کرلیا ہے، جو عرب دنیا کے لیے ایک بڑی کامیابی اور عالمی سطح پر بھی ایک اہم سنگ میل قرار دیا جا رہا ہے۔ امارات کی جوہری توانائی کارپوریشن کی جانب سے جاری بیان میں اس اہم منصوبے کی تکمیل کا اعلان کرتے ہوئے کہا گیا ہے کہ یہ جوہری توانائی کی جانب ایک نمایاں قدم ہے۔جوہری پلانٹ سے حاصل ہونے والی بجلی ابوظہبی نیشنل آئل کمپنی (ادنوک)، ایمریٹس اسٹیل، اور ایمریٹس گلوبل ایلومینیم سمیت دیگر صنعتوں کو فراہم کی جائے گی۔ کارپوریشن کے مطابق، اس جوہری بجلی پلانٹ کی سالانہ پیداوار 40 ٹیرا واٹ بجلی ہے، جو ملک کی بجلی کی ضروریات کا 25 فیصد پورا کرنے کی صلاحیت رکھتی ہے۔
یہ بھی یاد رہے کہ اس جوہری بجلی پلانٹ کے پہلے ری ایکٹر نے 2020 میں کام کا آغاز کیا تھا اور اب چوتھا ری ایکٹر بھی مکمل طور پر آپریشنل ہوگیا ہے، جو ملک کی توانائی کی ضروریات کو مزید مستحکم بنانے میں اہم کردار ادا کرے گا۔ یو اے ای کی اس پیش رفت کو عالمی سطح پر سراہا جا رہا ہے، جس نے نہ صرف عرب دنیا بلکہ دنیا بھر کے ممالک کو اپنی معاشی اصلاحات اور جدیدیت کے حوالے سے متاثر کیا ہے۔