اوچ شریف،باغی ٹی وی(نامہ نگارحبیب خان) عباسیہ لنک کنال کے قریب ایک افسوسناک حادثہ پیش آیا، جہاں علی پور سے ملتان جانے والی مسافرہائی ایس وین نہر میں جا گری۔ وین کے ڈرائیور نے سڑک کراس کرتے ایک راہگیر کو بچانے کی کوشش کی، جس کے نتیجے میں گاڑی بے قابو ہو کر نہر میں جا پہنچی۔
حادثے کے وقت وین میں 15 مسافر سوار تھے، جو خوش قسمتی سے پانی کی سطح کم ہونے کے باعث اپنی مدد آپ کے تحت باہر نکلنے میں کامیاب ہو گئے۔ تاہم ایک مسافرریاض خلیل (55 سال) سکنہ علی پور زخمی ہو گیا، جسے ریسکیو ٹیم نے فوری طبی امداد فراہم کرتے ہوئے رورل ہیلتھ سینٹر اوچ شریف منتقل کر دیا۔
ریسکیو عملے نے تصدیق کی کہ تمام مسافر محفوظ ہیں اور کوئی جانی نقصان نہیں ہوا۔
